Бұған дейін трассаға француздар жасаған 60 камера қойылады деп жоспарланған. Бірақ Kolesa.kz-ке облыстық полиция департаменті хабарлағандай, қазірше Алматы — Талдықорған тас жолының 170-шақырымына (Сарыөзек ауылынан үш шақырым жерде) және Шынгелді ауылының маңына орнатылады.
Полиция мәліметіне сенсек, камералар сағатына 300 шақырымға дейінгі жылдамдықты анықтап, ереже бұзған көлік нөмірін 200 метрден көре алады. Ең жоғарғы, ең төменгі және орташа жылдамдықты қадағалайды. Бұдан бөлек жол белгісі талабын бұзғандарды, арақашықтық сақтамағандарды және трафикті бақылайды. Қазір жабдықтар бапталып, Әкімшілік іс жүргізудің бірыңғай тізіліміне қосылып жатыр.
Тас жолда 60 жаңа фото және бейнетіркеу посты («автоураган») жұмыс бастайды. Олар қараша айында орнатылады. Полицейлер бұл техниканы сыннан өтіп, пайдалы екені дәлелденгендіктен таңдады. Айта кетерлігі, Mesta Fusion бірнеше жыл бұрын Нұр-Сұлтанда сынақтан өткен, бірақ кешен елорда сақшыларын таңғалдыра алмады. Ал Алматы — Талдықорған тас жолында орнатылған «француздардың» атқаратын функциясы көп, әрі жаңартылған, сол үшін де жабдыққа тағы бір мүмкіндік беріліп отыр.
Алдағы уақытта Алматы облысының тас жолдарында 130-ға жуық камера қойылады.
Комментариев: 0