Талғар тас жолы автокөлік жүргізушілері арасында қарбалас сәттердегі көп шақырымдық кептелістерімен танымал. Оны қайта қалпына келтіру жұмыстары келесі 2019 жылы басталып, сол жылы аяқталады. «Қазір сметалық есеп айырысу шаралары жүргізіліп жатыр, және осы жылдың соңына дейін біз тендер жариялап, жеңімпазды анықтағаннан кейін, дайындық жұмыстарын бастауға тиіспіз» — деді «ҚазАвтожол» ҰК-ның Алматы облыстық филиалы директорының орынбасары Қуаныш Ескендіров.
Шенділердің айтуынша, Алматы — Талғар автожолына 50 жылдан аса уақыт болған. Және осы күнге дейін мұндағы асфальтты тек жамап келген. Осы орайда, бұл жолдағы апат саны жыл санап артып келеді. Егер 2017 жылы мұнда 23 ЖКО-сы тіркелген болса, осы жылдың алғашқы жартысында олардың саны 17-ге жеткен. Және, жол апатынан екі адам қаза тапқан. Қазіргі таңда жолдың өткізу қабілеті тәулігіне 20 мың көлікті құрайды, ал қайта қалпына келтіру жұмыстары аяқталған соң, бұл көрсеткіш бірнеше есеге артуы тиіс.
Алдын ала болжам бойынша, тас жолды жөндеу жұмыстары шамамен 650 миллион теңге көлеміндегі қазына қаражатын қажет етеді екен. Жол жөндеушілер, нәтижесінде күре жолдың қауіпсіздіктің барлық талаптарына сай болатындығына сөз берді: мұнда жаңа тротуарлар, жаяу жүргіншілерге арналған өтпе жолдар, аялдама кешендері мен жарық шамдар болады. Құрылыс барысында ағаштардың барлығының сақталатынын да айтты.
Осы орайда айта кететін жәйт, Алматы — Талғар тас жолындағы мәселелердің басым бөлігі Бесағаш пен Тұздыбастаудың арасындағы Қотырбұлақ өзені арқылы өтетін көпірдің кесірінен орын алады. Жол осы тұста бөтелкенің тар аузына айналады, және тек осы көпірді кеңейтудің өзі жүргізушілердің өмірін жеңілдетері анық.
Комментариев: 0