Алматы — Қорғас тас жолынан тағы ақау шықты

Оқиға кеше 20:25 шамасында Нұрлы ауылының маңында болды. Әлеуметтік желіде тараған роликтен трассаның бір жағындағы жол жабыны көтеріліп кеткенін көруге болады.

«Қазавтожол» ұлттық компаниясы Kolesa.kz-ке бір түннің ішінде ақау жөнделді деп хабарлады. Бүгін таңғы 8:30-да жолды қолданысқа берген.

Мамандар бұған не себеп болғанын нақтыламады, бірақ видеодан плиталардың полимерленген асфальтпен жабылғаны байқалады. Бұған дейін бұл жерді жөндеген не осылайша ыстықтан қорғағысы келген сияқты. Бірақ өткен жазда микросюрфейсинг технологиясы бетонды қызып кетуден сақтамайтыны анықталып, жауапты мекеме оны қолданбаймыз деп шешкен.

Индустрия және инфрақұрылымдық даму министрлігіне қарасты Автомобиль жолдары комитетінің басшылары Kolesa.kz басылымына берген сұхбатында температуралық жіктерге дұрыс күтім жасалмағандықтан, бетон трассалардағы плиталар ашылып кетеді деді. Оларды тұрақты түрде тазалап, қызған кезде бетонның кеңейгенін көтере алу үшін жаңа баумен толтыру керек.

Бетон трассаны төсемей тұрып бетон жігін ретке келтіріп, кейіннен қорғаныс қабатын төсейді. Плиталар жаңарған аймақта ашылған болса, демек жол жөндеу технологиясы бұзылған.