Алматыда кейінгі екі жылда жеткізу қызметі жылдам дамып, мопед мінетіндер көбейді. Олардың көбі жол ержесін елемейді. Мысалы, тротуармен жүреді, қосарлы бүтін сызықты басады, қарсы бағытпен қозғалады және т. б. 2022 жылдың алғашқы үш айында қалада мопедтің қатысуымен 62 жол апаты болып, 72 адам зардап шеккен.
Polisia.kz порталы қалалық ПД Жергілікті полиция қызметінің басшысы Манап Саттаровқа сілтеме жасап хабарлағандай, қазір қызметкерлер мопед, велосипед және электросамокат мінген тұрғындармен профилактикалық жұмыс жүргізіп жатыр. Аталған шараның мақсаты — жол-көлік оқиғасын барынша азайту.
— Қос дөңгелекті көлік жүргізушілерін жол ережесін сақтауға шақырамыз. Заң бойынша қозғалтқыш көлемі 50 текше сантиметрден асса, ол әдеттегі көлік құралы ретінде тіркеліп, жүргізуші тиісті санаттағы куәлік алуы керек. Сондай-ақ мопедшілер қозғалыс кезінде міндетті түрде қорғаныс құралын пайдалануы қажет, — деді Манап Саттаров.
Жыл басынан бері 38 мопед жүргізушісі жауапқа тартылды. Бірақ оларға қандай бап бойынша айыппұл салғанын полицейлер айтқан жоқ.
Айта кетейік, мопедті (50 текше сантиметрге дейін) 16 жасқа толғандар міне алады. Мопедпен қоғамдық көлікке арналған жолақты қоса алғанда, жүргін бөліктің оң жақ шетімен жүруге рұқсат беріледі. Бұл тек велосипед жолағы болмаған жағдайда ғана, егер ол бар болса, мопедшілер веложолақпен қозғалуға міндетті. Kolesa.kz бұған дейін мопед жүргізу ережесі жайлы материал жариялаған.
Комментариев: 0