Тәртіп сақшылары 6 наурызда аялдау және тоқтап тұру ережесін бұзғандарға ерекше назар аударды.
«Патрульдік полиция экипаждары заңды өрескел бұзғандарды және көлікті тұраққа қою ережесін сақтамағандарды анықтауға және тоқтатуға жұмылды. Сауда үйлері, базарлар, оқу орындарының маңайы, мешіттер және көлік қоюға арналмаған басқа да жерлер ерекше назарда», — деді Алматы қаласы полиция департаменті басшысының орынбасары Тимур Ноғайбаев.
Бейнероликте Омаров көшесіндегі мешіт жанындағы патруль жұмысы көрсетілген. Полиция бір рейд жүргізіп, 40-тан астам құқық бұзушыны анықтады. Жүргізушілерге айыппұл салып, заңсыз тұраққа қойылған және иесі табылмаған көліктерді арнайы тұраққа жіберді.
Әкімшілік кодекстің 597-бабына сәйкес:
- Осы баптың екінші, үшінші бөліктерінде көзделген жағдайларды қоспағанда, көлік құралдарының аялдауы немесе тоқтап тұруы қағидаларын бұзу 5 АЕК (2024 жылы 18 460 теңге) мөлшерінде айыппұл салуға әкеп соғады.
- Көлік құралдарын тротуарда тоқтату немесе оның тоқтап тұру қағидаларын бұзу, сондай-ақ көлік құралдарын гүлзарларда, көгалдарда, балалар немесе спорт алаңдарында тоқтату немесе оның тоқтап тұруы 10 АЕК (36 920 теңге) мөлшерінде айыппұл салуға әкеп соғады.
- Басқа көлік құралдарының жол жүрісіне кедергі келтіруге әкеп соққан, көлік құралдарын жолдың жүру бөлігінде тоқтату немесе тоқтап тұру қағидаларын бұзу 10 АЕК (36 920 теңге) мөлшерінде айыппұл салуға әкеп соғады.
- Мүгедектігі бар адамдардың көлік құралдарын тоқтату немесе тоқтап тұру үшін бөлінген жерлерде көлік құралдарын тоқтату немесе тоқтап тұру қағидаларын бұзу 10 АЕК (36 920 теңге) мөлшерінде айыппұл салуға әкеп соғады.
Комментариев: 0