Осы жылдың алғашқы төрт айында оңтүстік астанада болған 765 жол апатынан 884 адам зардап шегіп, 23 адам ажал құшқан. Тәртіп сақшыларының есебінше, бұл өткен жылмен салыстырғанда 28.4 %-ға төмен.
«Жол-көлік оқиғасының азаюына апат жиі болатын жерлерге «Сергек» камераларының орнатылуы септігін тигізді. Қазіргі уақытта Алматыда осындай 404 камера жұмыс істеп тұр. 2020 жылдың соңына дейін қосымша 380 (қиылыстарға — 210, тік жолдарға — 170) камера орнату жоспарда бар. Биылғы төрт ай ішінде аталған құрылғылар 60 мыңнан аса жол ережесін бұзу дерегін тіркеп, 436 млн теңгеден асатын сомаға айыппұл салды. Одан бөлек, қалада 105 «Жол қозғалысының қауіпсіздігі» автоматтандырылған ақпараттық жүйесі іске қосылған. Камера бар жерлерде ереже бұзу 20 %-ға азайғаны байқалады. Ақпараттық жүйе 77 ереже бұзу дерегін анықтап, 394 млн теңге айыппұл салды», — деп хабарлады Алматы полиция департаментінің басшысы Қанат Таймерденов.
Естеріңізге сала кетейік, Алматыдағы «Сергек» айыппұл салуды 2020 жылдың 1 қаңтарынан бастады. Бұл камералар жылдамдықты арттыру, бағдаршамның қызыл түсіне өтіп кету, жол белгілері мен жолдағы таңбаларды елемеу, аялдау және көлік құралдарын тұраққа қою ережелерін бұзу, сонымен қатар қоғамдық көлікке арналған жолақтарға шығып кету сынды ереже бұзу әрекеттерін тіркейді.
Комментариев: 0