Алматы — елдегі электросамокат саны ең көп қала. Шаһарда мұндай көліктің мыңнан астамы жалға беріледі. Тұрғындардың меншігінде қаншасы бар екені белгісіз.
«Жақында қаланы аралап жүргенімде мені самокат қағып кете жаздады. Орынбасарыма хабарласып, олар әкімнің өзін қағып кетуге аз қалса, қарапайым қала тұрғындары үшін тіпті қауіпті екенін айттым», — деді Ерболат Досаев Алмалы ауданының халқымен кездесуде.
Әкім полицейлердің ҚР жол ережесіне электросамокатқа қатысты тармақ енгізгелі жатқанын айтты. Арнайы заң талабы болмаса жергілікті билік самокатшылар мен мопедшілерді жауапқа тарта алмайды.
«Мопед мінгендерге жүргізуші куәлігін алуды міндеттеу туралы ұсыныс түсті. Сондай-ақ самокат жалға беретін орталықтардан жалға алушының жасын растауды сұрадық. Қалалық деңгейде реттеуге мүмкіндік болса, реттейміз. Ал ІІМ заңнамалық базаны дайындап болғанша самокат жалға беретін орталықтармен жұмыс істейміз», — деді әкім.
Айта кетейік, депутаттар екі жыл бұрын жол ережесінде скутер және электросамокат жүргізушілерінің құқығы мен міндетін белгілеуді ұсынған. Бірақ ережеге ешқандай өзгеріс енген жоқ. Ал қазір электросамокат жылдамдығын шектеп, өзге де техникалық талаптар қоятын арнайы стандарт дайындалып жатыр. Жол ережесіне де өзгеріс енуі мүмкін.
Комментариев: 0