Алматы әкімдігі экопостарды алып тастауы мүмкін

«Экопостың тиімді жұмыс істеуі қиын. Біз ҚР ІІМ-мен бірге өзге мүмкіндіктерді қарастырып көреміз. Оларды алып тастауымыз мүмкін, өйткені автомобильден шығатын зиян газды жаңа технология арқылы анықтауға болады. „Сергек“ жобасына жауапты „Көркем Телеком“ компаниясымен бірге жұмыс істейміз. Оның бізге қажет жаңа индикаторы бар, бірақ оны алдымен заңда бекіту керек. Алда осыны жүзеге асырғымыз келеді», — деді Ерболат Досаев брифингте.

Әкім оңтүстік астанаға ерекше экологиялық мәртебе беруді ұсынып отыр. Оның айтуынша мегаполисте машиналарды техникалық тексерістен өткізу талабын күшейтіп, экостандартты өзгерту қажет. Ерболат Досаев Алматыда күніне 800 мыңға жуық автомобиль жүретінін айтты. Әсіресе жүк көліктері қала экологиясына ауыр зиян тигізеді.

Шаһар басшысы биыл күзде парламентке «экологиялық» ұсыныс жолдауға уәде берді.

«КөркемТелеком» Kolesa.kz редакциясына компанияда жүріп бара жатқан машинаның зиян газ мөлшерін өлшейтін мүмкіндік бар екенін растады. Бірақ әкімдік бұл мәселе жөнінде ұсыныс жасамапты.