«Сулабия» ескі дөңгелектер үйіндісі Кувейт астанасы Эль-Кувейтке жақын Сулабия қаласының маңында орналасқан. Шиналар үйілген қоқыс орнының үлкендігі сонша, ол ғарыштан да көрінеді. Болжам бойынша онда 50 миллионға жуық шина жатыр. Бұл қоқыс полигоны жиі отқа оранады. Ең үлкен өрт 2012 жылы сәуірде сөндірілген. Енді сол дөңгелек резеңкелері тағы өртеніп отыр.
?? World's Largest Tire Landfill in Kuwait in Flames pic.twitter.com/oz4ivk17Ep
— Pman-News (@DPoertsch) August 3, 2021
Жергілікті БАҚ хабарлағандай, қоқыс алаңында 3 тамызда тұтанған өрт әлі жалғасып жатыр. Төтенше жағдай орнынан көтерілген қою қара түтін алыстан көрінеді. 600 мың шаршы метр аумақты от шарпыды, аумағы ұлғайып келеді. Өртенген шинадан өте улы заттар бөлінеді. Егер салдары тез арада жойылмаса, Кувейт экологиясы мен тұрғындар денсаулығына ауыр зиян тигізуі мүмкін.
Бұл аймақта қолданылған шинаны қайта өңдеу мәселесі ұзақ уақыттан бері шешілмей келеді. Кувейт билігі отыз жыл бойы қолданылған дөңгелектерден құтылудың амалын таба алған жоқ.
Салыстыру үшін айтсақ, Қазақстан бұл мәселені бақылауда ұстауға тырысады. Ескі шиналардың шағын үйінділері кездескенімен, дөңгелек ауыстыру орталықтары мен кәсіпорындардан шыққан резеңкелер біртұтас жиналады. Қазір елімізде 20-дан астам шина өңдеу зауыты бар.
Комментариев: 0