Өткен аптада Hagerty аукцион үйі жаһан тарихындағы ең қымбат автокөлік атағының иесі ауысқанын хабарлады. 2018 жылы 48.4 млн долларға сатылған 1962 жылғы Ferrari 250 GTO орнын 1955 жылғы Mercedes-Benz 300 SLR Uhlenhaut Coupe басты. Темір тұлпар жабық аукционда 135 млн еуроға (143 млн доллар) бағаланды.
Небәрі екі данасы жарық көрген бірегей купе енді Mercedes-Benz музейіне тиесілі емес. Көлікті сатып алған адамның аты аталмады. Бірақ оның өкілі бір жарым жыл бойы «Мерседес» басшыларын бәссауда ұйымдастыруға үгіттеген екен.
300 SLR — Формула-1 жарысында әйгілі Хуан Мануэль Фанхио тізгіндеген W196R-дің қарапайымдау нұсқасы. Ол жарысқа қатысу үшін жасалған, алайда 1955 жылы 11 маусымда 83 көрерменнің өмірін қиған апат спорткарды мансабынан айырды. Mercedes-Benz жеті SLR шығарды, оның екеуі ортақ қолданыстағы жолда жүруге рұқсат алған Uhlenhaut Coupe нұсқасына негіз болды.
Модель 302 арғымағы бар 3 литрлік қатарлы алтылық арқылы қозғалады. Бес сатылы механикамен жұптасқан агрегат көліктің алғашқы жүздікті 6.9 секундта алуына мүмкіндік береді. 1956 жылы Autocar журналистері максимал жылдамдығы 284 шақырымға жететінін анықтады.
Red аталатын (салон түсіне байланысты) купе 67 жыл ғұмырында 6045 км жол жүріпті.
Blue атты екінші Mercedes-Benz 300 SLR Uhlenhaut Coupe әлі де марка мұражайында тұр. Red те көзден таса болмайды. Өйткені иесі купені түрлі көрмелерге апаруға ниетті. Саудадан түскен 135 млн еуроға келер болсақ, ақша қайырымдылыққа және оқу бағдарламаларын қаржыландыруға жұмсалады.
Комментариев: 0