Әлемде катализатор ұрлығы өршіп тұр

АҚШ-та ұрланған катализдік бейтараптандырғыш сатып алумен айналысатын қылмыстық топ анықталды, ұрланған өнімнің жалпы сомасы 600 млн доллар болған. Қазірге дейін әртүрлі штатта 21 адам ұсталды.

Заңсыз бизнес жасағандар мол пайдаға кенеліпті. Мысалы, Сакраментода тұратын бір отбасы — ағайынды Тоу Сью Ванг (32 жас) пен Эндрю Ванг (28 жас) және олардың 58 жастағы анасы катализатор саудасымен айналысып, 32 млн доллар тапқан, олар сатып алған затты Нью-Джерсидегі металл өңдеу зауытына жөнелтіп отырған. Бұл туралы Fox News хабарлады.

Катализдік бейтараптандырғыш машинаның түрі мен штатқа байланысты заңсыз нарықта 1000 доллардан жоғары бағаға өтеді. Оны бір минутқа жетпейтін уақытта ұрлауға болады, дейді АҚШ прокуратурасы. Қазір пайдаланылған газды тазартуға қажет бағалы металл алтынан қымбат болып тұр.

Құқық қорғау органдары миллиондаған машинаны катализатор ұрыларынан қорғай алмай отыр. Ал өндірушілер мен көлік иелерінің қымбат жабдықты шешіп алу жолын қиындатудан басқа амалы жоқ.