Әл-Фарабидегі Есентай арқылы өтетін көпір қандай болады

Ертеректе Весновка аталып жүрген Есентайдағы көпір сексенінші жылдары салынған. Ені тар көшеде күнде кептеліске тап боласың.

Ерболат Досаев қайта жөндеу жұмыстарын 2023 жылы бастайтынын айтты. Қала билігі бұл іске 1.9 млрд теңгеге жуық қаражат бөлді, ендігі мәселе мердігер табу. "Біз көпірді кеңейтеміз деп шештік. Қазір жоба-смета құжаты мемлекеттік тексерістен өтіп жатыр. Ақпанда дайын болады. Құрылыс жұмысын мемлекеттік сатып алу процесі өткен соң бастауды жоспарлап отырмыз, — деген еді шаһар басшысы.

Бірақ билік 2021 жылы қабылдап, биыл бекіткен жоба бойынша көпір алты жолақты күйінде қалады, екеуінің ені 3.75 метр, қоғамдық көлік жүретін бөлігі 4 метр болады. Екі қапталына ені 1.5 метр болатын қауіпсіздік жолақтарын сызады. Бөлу сызығына биіктігі 1.1 метр, ал шетіне 1.3 метр болатын темір қоршау орнатады. Көпірдің ені — 31.94 метр, ұзындығы — 36.6 метр.

Демек жүргін бөліктің ені бір-екі метр кеңейіп, жалпағырақ болғанмен, саны өзгермейді. Оның үстіне төрт жолақты Шашкин көшесінен үш жолақты көпірге бет алған көліктер тағы қаңтарылып тұрады. Кептеліспен күрескені осы ма?

Бүйір жағына жарық діңгегін орнатып, велосипед айдауға ыңғайлы ету, ал төменгі жағын серуендейтін алаңға айналдыру жоспарда бар.

Алты жыл бұрын Байбек даңғылды сегіз жолаққа бөліп, қала инфрақұрылымын реттегісі келгенімен, ол жобадан әрі аса алмады.

Ұзақ жыл үздіксіз пайдаланып, тозығы жеткен көпір пайдалануға қауіпті болғандықтан, оны қайта жөндеу жоспарланып отыр. Әкімдік Kolesa.kz баспасына солай деді.

Пайдалану кезінде көпірдің жүк көтергіштігіне, құрылымның беріктігіне әсер ететін өзгеріс пайда болды. Ол өте қауіпті. Аралық конструкциялардың шетінде орналасқан бетонда кетік бар, бетонның қорғаныс қабаты бұзылған, бұл жүк көтергіштігін төмендетеді. Жалпы техникалық жағдайы мен ақауды ескерсек, көпірдің жағдайы «нашар», «апат алдында тұр» дегенді білдіреді.

Қайта жөндеу жобасы негізінде аралық құрылыс тақталарын ауыстырып (аралық құрылыста 6 см-ге дейін майысқан плиталар бар), қоршау орнату, алты жолақты жүргін бөлік жасау жоспарда бар. Асфальтбетоннан жасалған көпірдің бір бағыт бойынша ені қазір 11.25 м, ал жөндеуден кейін 14.5 м болады деді шенеуіктер. Жоба бойынша көпір алты жолақты, бірақ әр бағытқа тағы бір жолақтан қосуға мүмкіндік бар. Қосымша жолақ қосу-қоспау көпір қолданысқа берілген соң белгілі болады.