Алматы әкімі Ерболат Досаев Бостандық ауданы тұрғындарымен кездесуде Есентай өзені арқылы өтетін көпір тар болғандықтан Әл-Фараби даңғылында үнемі кептеліс болатынын айтты. Жүргізушілер мұнда жұмыс күндері ғана емес, демалыста да кептелістен көз ашпайды. Проблеманы шешу үшін көпірді кеңейтіп, екі жағынан жаяу жүргіншілер өткелі мен мүмкіндігі шектеулі жандарға арналған пандус салу туралы шешім шықты.
«Жобалық-сметалық құжат ақпанның аяғына дейін дайын болады. Ал құрылыс жұмысы мемлекеттік сатып алу процедурасы аяқталғаннан кейін басталады», — деді әкім.
Жоба жасаушыларға берілген техникалық тапсырмада «құрылыс кезіндегі көлік қозғалысын қазіргі схемаға ұқсас етіп ұйымдастыру» қажет екені жазылған. Демек жүргізушілер бұл жерден айналып өтеді. Бірақ таңдау көп емес: BRT жолағы болғандықтан (әкім оны жаңартуға уәде берген) тар әрі күнде кептеліс болатын Тимирязев бойымен, қарбалас сәтте қозғалыс қиындайтын Бұқар жырау не Сәтбаев көшесімен немесе Абай даңғылымен (таң мен кеште мұнда да кептеліс болады) жүруге тура келеді.
Комментариев: 0