Оңтүстік Осетия мен Абхазияның тіркеу нөмірі бар көліктер Қазақстанда жиі көзге түсіп жүр. Тіпті олар біздің елде сатылымға шыға бастаған. Әрине көліктер сенімхат арқылы ғана сатылады. Осы жерде мынадай орынды сұрақ туындайды: аталған машиналарды сатып алып, ел аумағында жүру заңды ма?
Бұл сұраққа ҚР Қаржы министрлігіне қарасты Мемлекеттік кірістер комитеті жауап берді. Мекеме өкілдерінің хабарлауынша, Абхазия мен Оңтүстік Осетиядан келген автомобильдер шетелдік тауар саналады. Демек олар уақытша әкелу ережесіне сәйкес қаралады.
ЕЭО Кеден кодексінің 264-бабы 6-тармағы және 275-бабы 2-тармағына сәйкес, уақытша кіргізілген көлік құралдарына оны тікелей әкелген және кедендік құжатта тіркелген тұлға ғана иелік етіп, пайдалана алады. Яғни, Абхазия мен Оңтүстік Осетияда тіркелген автокөліктің иесі оны Қазақстан азаматына сата алмайды және пайдалануға бере алмайды. Сол үшін мұндай машиналарды сатушылар да, сатып алушылар да жауапкершілікке тартылады. Істің әкімшілік немесе қылмыстық сипатқа ие екені мемлекетке келген зиян мөлшеріне байланысты анықталады.
Мемлекеттік кірістер комитетінің хабарлауынша, Абхазия мен Оңтүстік Осетиядан келген көлікті кедендік тазартудан өткізіп, алым-салық төлегеннен кейін ғана Қазақстанда пайдалануға болады.
Тағы бір айта кетерігі, Қазақстан Абхазия Республикасы мен Оңтүстік Осетияның тәуелсіздігін әлі ресми мойындаған жоқ.
Комментариев: 0