Оңтүстік астанадағы Әл-Фараби мен Абай даңғылдары былтыр толық жөндеуден өткен. Қаланың басты магистралінде екі айға созылған жұмыс көптің есінде қалды. Жолшылар жаңа технология пайдаланғандарын ауыз толтыра айтып, ауа температурасы жоғары болғанда беріктігі артады деп полимер қосты. Мамандар Абай даңғылында америкалық Titan қоспасын қолданған, ол асфальттың беріктігі мен тұтқырлығын қарапайым қоспамен салыстырғанда сегіз есе арттыруы керек еді.
Полимерлі асфальт стандарт бойынша 5 емес, 7-8 жыл шыдауы керек болатын. Алайда, тура бір жыл өткенде Абай даңғылының автобус жүретін бөлігінде ойық пайда болды. Тимирязев көшесіндегідей емес, тереңдігі шамамен 5 см.
Қалалық мобилділік басқармасы Kolesa.kz редакциясына былтыр қыркүйекте мына учаскелерде мониторинг жұмыстарын жүргізгенін хабарлады:
- Абай даңғылы,
- Әл-Фараби даңғылы,
- Сейфуллин даңғылы,
- Байзақов көшесі,
- Гоголь көшесі,
- Төле би көшесі.
Яғни, былтыр Абай мен Әл-Фараби даңғылында Titan қоспасы бар жаңа асфальт төселсе, басқа көшелерде PR Plast (Франция өнімі) қоспасы қолданылды.
«Қызметкерлер жол жағдайын қарап, жол тегістігі мен шөккен жердің тереңдігін үш метрлік тақтаймен өлшепті. Тексеріс кезінде ылғалдану, қабыршықтану, үгілу және жарылу сияқты ақаулар анықталған.
Тексерілген учаскелердегі ойықтың тереңдігі қалыпты күйде. Қаладағы жол жағдайына ыстық қайтқан кезде (шамамаен қазан айында) кезекті мониторинг жасау жоспарда бар», — деді мамандар.
Өтінішімізден кейін жолшылар даңғылдағы ойықты тамыздың аяғына қарай (стандарт бойынша 5 күнде жөндеуге тиіс) жөндеуге уәде берді. Қазір күн тым ыстық көрінеді.
Алматыдағы жаңа полимерлі қоспасы бар жол жоғары температураға төтеп беруі керек емес пе? Әлде тағы бәрін «аптап ыстыққа» жаба ма? Ақауды жою кепілдік бойынша мердігерлерге жүктеледі.
Басқарма өкілдерінің айтуынша жолдың шөккен жерлерін жөндеу жұмыстары басталды. Бұл ақаулар оңтүстік астана жүргізушілерін бұрыннан мазалап келеді.
«Жолдың не себепті ойылғанын анықтау мақсатында зерттеу жүргізіліп, нәтижесінде асфальт-бетон зауыттарына қоспа таңдау, полимер қосу, сапаны бақылау жөнінде ұсыныстар берілді. Алматыда асфальтбетон деформациясын есепке алып, оның жол төсемінің құрылымына әсерін анықтау үшін жол төсемі мен автомобиль жолдарының топырағындағы температура мен ылғал мөлшерін бақылау жүйесін орнату жоспарда бар», — деп түсіндірді әкімдік.
Биыл мегаполистегі көшелерді орташа жөндеу барысында екі емес, бірден төрт қоспа: америкалық Titan, франциялық PR Plast, неміс Butonal-BASF және отандық ПБВ-60 («Қазақ Битум» өндірісі) сынақтан өтіп жатыр.
Комментариев: 0