Бүгін мәжіліс кулуарында Энергетика вице-министрі Әлібек Жамауов Қазақстан нарығында сұйытылған мұнай газы тапшы екенін айтты. Ол жүргізушілердің арзан отынға қызығуы газ тапшылығын тудыратын басты себептердің бірі деп санайды.
«Кейінгі екі жыл бойы осы тапшылықтың орнын толтыруға тырысып жатырмыз. Ұлттық компаниялардан бізді қолдап, сұйытылған мұнай газын басқа отын түріне қарағанда көбірек өндіруді сұрадық. Сұйытылған мұнай газын экспорттауға тыйым салып, бағаны біртіндеп көтеруді жоспарлап отырмыз. Биыл жанармай бекетіндегі баға 5–8 теңге шамасында өсті. Келер жылы тағы 10 теңге қосылады», — деді Жамауов.
Вице-министр үкімет газ бен бензин бағасын теңестіруге тырысатынын атап өтті. Өйткені сұйытылған мұнай газын машина отыны ретінде емес, мұнай-газ химиясы ретінде пайдалану керек.
«Уақыт өте баға бензинмен теңескенде жүргізушілер сұйытылған мұнай газына көшуді тоқтатады», — деді шенді.
Мәжіліс отырысында депутаттар газ тапшылығымен байланысты мәселе қашан шешілетінін сұрады. Жауап ретінде вице-министр 2030 жылдары Қашаған, Қарашығанақ сияқты ірі кен орындарында сұйытылған мұнай газ өндірісі басталғанда ғана шешілетінін айтты. Біріншісі жылына 800 мың тонна, екіншісі 600–700мың тонна отын өндіреді.
Биыл жазда және қыркүйектің басында Қазақстанның батыс және оңтүстік өңірлерінде газ тапшылығы байқалды. Шенділер бұған газ баллон орнатқан машинаның көптігі әсер етті деп ақталудан жалыққан емес.
Комментариев: 0