2025 жылдың 1 қаңтарында алым-салық өседі

Қаржы министрлігі айлық есептік көрсеткіштің (АЕК) жаңа мөлшері жазылған құжат жобасын әзірледі. Қазір оның көлемі 3692 теңге шамасында. Ал 1 қаңтардан бастап 3932 теңге болады. Нәтижесінде мемлекет қазынасына түсетін алым-салық, айыппұл сомасы да өседі.

Жол ережесін бұзғандар көп айыппұл төлейді

Мысалы, қазір көлік жылдамдығы сағатына 10-нан 20 км-ге дейін асса (5 АЕК), жүргізуші 18 460 теңге айыппұл төлейді, ал 1 қаңтардан бастап мемлекетке 19 660 теңге берешек болады. Бұл қауіпсіздік белдігін тақпаған, шлем кимеген не аялдау және тоқтау ережесін бұзған жүргізушілерге де қатысты.

Бағдаршамның қызыл түсіне өтіп кеткендер (10 АЕК) қазір 36 920 теңге айыппұл арқаласа, келер жылы 39 320 теңге санап беруге мәжбүр болады. Көлік жылдамдығы сағатына 20-дан 40 км-ге де асса, мүгедектерге арналған орынға көлік қойса және зебрада жаяу жүргіншіні өткізбесе дәл осындай жазаға тартылады.

Жүргізуші куәлігінен айырылса да, көлік тізгіндеп жүріп ұсталған не апатқа қатысып, ол жерден қашып кеткен азамат 184 600 теңге (50 АЕК) орнына 196 600 теңге береді.

Утиль алымы қымбаттайды

Утиль алымын алып тастауға петиция көмектесе алмады, сондықтан 2025 жылы оның да мөлшері артады.

Қозғалтқыш көлемі 1000 текше см-ден аспайтын жеңіл автомобиль үшін 294 900 теңге беру қажет. Ал мотор көлемі 2000 текше см-ден жоғары көлік үшін 688 100 теңге, 3000 текше см-ге жетпесе, 983 мың беруге тура келеді. Ал мотор көлемі үш литрден асатын машина алғандар ел қазынасына 2 260 900 теңге құяды. Бұл алым елге электромобиль кіргізгенде ғана сұралмайды.

Автомобильді есепке қою құны өседі

Автомобильді бірінші рет тіркегенде сұралатын сома (0.25 АЕК) 923 теңгеден 983 теңге болып ауысады. Шыққанына 3 жылдан аспаған машина алған тұлға 196 600 теңге (50 АЕК) санап береді. Ал 3 жыл бұрын және одан ерте шыққан көлікті бірінші рет тіркеу үшін қалтада 1 966 000 теңге болуы керек.