Қаржы нарығын реттеу және дамыту агенттігі автосақтандырудың жаңа бағасын бекітті. Қазір оның сомасын анықтағанда жүргізушінің жасы мен көлік тізгіндеу тәжірибесі, автомобиль типі, оны пайдалану мерзімі, тіркелген аймақ пен көлік иесінің апатқа түсу жиілігі ескеріледі. Ведомство өкілдері келер жылы 1 қаңтардан бастап жоғарыда аталған параметрлерге көлік құралы тіркелген аймақтағы апат коэффициенті қосылатынын хабарлады.
Ол белгілі бір өңірде қолданылатын сақтандыру төлеміне байланысты болады. Мәселен, қазір Алматыдағы көлік иелері дәл сол мегаполис көшелерінде жүрген облыс тұрғындарымен салыстырғанда әлдеқайда көп ақша төлейді.
Егер норма күшіне енсе, елдің 11 аймағында міндетті сақтандыру сомасы біршама түседі. Мысалы, Алматыда — 18 %, Атырау облысында — 29 %. Ал бір-екі өңірде керісінше, қымбаттайды (Астанада — 5 %, Шымкентте — 9 %). Ал Қарағанды, Ұлытау облыстарында өзгеріс болмайды.
Агенттік мамандары бұл тәсілді қолдану автосақтандыру бағасының әділетті болуына ықпал етіп, сыйақы мөлшерін дер кезінде реттеуге мүмкіндік береді деді. Осы салада қызмет ететін ұйымдар сақтандыру сомасын жылына бір мәрте +/—10 % өзгертуге құқылы болады.
Комментариев: 0