2022 жылғы автонарық Ресей-Украина қақтығысына байланысты бірнеше танымал марка мен модель елден кетіп, Қытай көліктерінің көбеюімен және рекордтық сатылыммен есте қалады. Қазақстан автобизнес қауымдастығы (ҚАБҚ) 12 айда елде 123 778 көлік өткенін хабарлады. Бұл 2021 жылмен салыстырғанда 5.3 % жоғары әрі кейінгі жеті жылдағы рекордтық көрсеткіш болды. Қаңтар оқиғасы болмаса бұдан да көп автомобиль сатылуы мүмкін еді, өйткені жылдың алғашқы айында дилерлер 4000 машина ғана саудалаған.
Желтоқсандағы нәтижені бөлек атап өтейік. Жылдың соңғы айында 13 759 автомобиль өтті, бұл 2022 жылғы ең үздік көрсеткіш болды.
Ең көп өткен маркалар
2022 жылы Chevrolet-нің көш бастағаны ешкімді таңғалдырған жоқ. 12 айда «шеви» 34 289 машина сатты, бұл бір жыл бұрынғы көрсеткіштен 17.8 % жоғары. Екінші орында 28 864 көлігі өткен Hyundai тұр, олар 2021 жылмен салыстырғанда 27 % көп сауда жасады. Үздік үштікті Kia түйіндеп тұр, марканың 14 421 көлігі иесін тауып, жақсы нәтиже көрсетті (+48.6 %).
Toyota саудасы 2021 жылмен салыстырғанда құлдырап (—21 %), төртінші орынға түсті. Бір жылға жуық Camry мен RAV4 жеткізе алмаған жапондар 9622 машина сатты. АВТОВАЗ 2022 жылы біздің елге көлік кіргізе алмаса да, «Лада» (7386 дана) рейтингте бесінші орынды сақтап қалды. Қытайлық Chery (4464) нарыққа шыққан алғашқы жылдың өзінде алтыншы орынға ие болды.
2022 жылғы жаңа автомобиль нарығындағы үздік 10 марка
| Орын | Марка | 2022 жылдың 12 айындағы сатылым (дана) |
| 1 | Chevrolet | 34 289 |
| 2 | Hyundai | 28 864 |
| 3 | Kia | 14 421 |
| 4 | Toyota | 9622 |
| 5 | Lada | 7386 |
| 6 | Chery | 4464 |
| 7 | JAC | 3371 |
| 8 | Lexus | 2540 |
| 9 | Exeed | 1876 |
| 10 | Haval | 1500 |
Жылдың танымал модельдері
Ең көп сатылған модель — Chevrolet Cobalt, седанның 23 178 данасы өтті. «Кобальт» марка саудасының 68 %-ын ұстап отыр. Оның үстіне седан рейтингте екінші орында тұрған Hyundai Tucson кроссоверінен (8862 да) үш есеге жуық көп өткен. Үздік үштікті Chevrolet Nexia (7145) түйіндеп тұр. Ол Tucson-нан көп өтуі мүмкін еді, бірақ 2022 жылы модельдің Өзбекстандағы негізгі өндірісі 22 000 данаға дейін қысқарып, жыл аяғында конвейерден алынды. Енді биыл көктемде Қазақстанға келетін Onix седанын күтеміз, модель Көлік типін мақұлдау құжатын алды.
Төртінші және бесінші орынға Hyundai Elantra (4981 дана) мен Hyundai Sonata (4563) жайғасты.
Үздік ондықта Hyundai Creta, Toyota Camry және RAV4 сияқты танымал модельдер жоқ, ал бюджеттік Accent өте аз саудаланды, 2021 жылы 9063 данасы сатылған седанның былтыр 2970 данасы ғана иесін тапты. Бұған Ресейге салынған санкция әсер етті. Аталған модельдер Қазақстанға Ресейдегі зауыттардан дайын өнім түрінде немесе біздің елде құрастыру үшін көлік жинағы ретінде келетін. Accent пен RAV4 жыл аяғына қарай автосалондарға оралды, ал Camry мен Creta әлі келген жоқ.
Өндіріс туралы
2022 жылы елде сатылған 124 мыңға жуық жаңа автомобильдің 114 мыңын жергілікті зауыттар құрастырған. Оның көбі жеңіл көлік (103 345 дана). ҚАБҚ Қазақстандағы кәсіпорындар нәтижесі 2021 жылмен салыстырғанда 21.9 %-ға өскенін хабарлады. Kolesa.kz редакциясының есебінше, Қазақстан азаматтары өз күшімен елге 50 мыңнан аса жаңа және ескі көлік әкелген.
Зауыттар арасында Қостанайдағы «СарыарқаАвтоПром» көш бастады. Онда Chevrolet мен Kia-ның барлық топтамасы шығады. Алматыдағы Hyundai Trans Kazakhstan зауыты 37 205 дана өнім шығарды, мұны Қостанайда жасалған 70 029 автокөлікпен салыстыру қиын.
Комментариев: 0