ҚР «Жол жүрісі туралы» заңның 88-бабына сәйкес, шыққан жылын қоса алғанда, шығарылғанына жеті жылдан аспаған, автомобиль көлiгi саласындағы кәсiпкерлiк қызметте пайдаланылмайтын М1 (жеңіл көліктер) санатындағы көлiк құралдарын қоспағанда, Қазақстан Республикасының аумағында жол жүрiсiне қатысатын және уәкiлеттi органда тiркелген механикалық көлiк құралдары мен олардың тiркемелерi мiндеттi техникалық тексерістен өткізіледі.
Басқаша айтқанда, жеке иеліктегі жеңіл көліктің 2012 жылдың қай айында шығарылғаны маңызды емес. 2019 жылы бәрібір техникалық тексерістен өтуге міндеттеледі. Оның үстіне бұл мәселе қаңтардың алғашқы күндерінде-ақ шешілуі керек, себебі жол қозғалысы ережелеріне сай, техникалық байқаудан өтпеген автокөлікпен жүруге Қазақстанда тыйым салынған. Дегенмен, мереке күндері техникалық тексерістен өткізу орындары жұмыс істей ме, жоқ па, ол жағын өздері шешеді.
Әкімшілік кодекстің 590-бабына сәйкес, тексерістен өтпеген көлікті басқарғаны үшін салынатын айыппұл көлемі — 5 АЕК (2019 жылы 12 625 теңге) мөлшерін құрайды. Ал дәл осы құжаттың 797-бабына («Көлік құралын ұстап алу, жеткiзу және пайдалануға тыйым салу») сай, уәкiлеттi лауазымды адам көлiк құралын пайдалануға тыйым салу себептерi жойылғанға дейiн мемлекеттiк тiркеу нөмiрi белгiлерiн алып қою арқылы көлiк құралдарын пайдалануға тыйым салуға құқылы. Яғни, алынған нөмірді көлік иесі ереженің бұзылу себептері жойылғаннан кейін ғана қайтара алады.
Газель сияқты көліктер жыл сайын өту керек па немесе оларға да 7 жыл ма екен?