200 тоннаға жуық АИ-92 Қырғызстанға заңсыз кеткен

Қаржылық мониторинг агенттігі Қырғыз Республикасына бензин жеткізіп, пайдаға кенелген қылмыстық топты тергеу процесі аяқталғанын хабарлады. Ведомствоның дерегінше тоғыз адамнан құралған топ жанармай алу, құжат рәсімдеу және көрші елге жеткізу үшін 12 фирма ашқан.

Бензинді заңдастырып, шекара асыруды көздеген олар «Қара Май ОйЛ» шағын мұнай өңдеу зауыты мен Petro Bazis ЖШС-ін пайдаланыпты. Қағаз жүзінде бұл кәсіпорындар бензинді жеңіл дистиллятпен не еріткішпен араластыру қызметін көрсеткен. Алайда шын мәнінде отынды өңдемей-ақ, теміржол цистернасына жеткізген.

Содан соң жалған құжат жасап, онда бензинді хош иісті көмірсутек қоспасы, жеңіл көмірсутекті еріткіш не оның қоспасы деп көрсетіпті. Кейін мұнай-химия өнімі ретінде Қырғызстанға өткізген, тіпті өзімізге жетпей жатқан кезде бұлар саудасын тоқтатпады. Заңсыз экспортталған бензиннің жалпы көлемі 190 мың тоннадан, сауда айналымы 37.2 млрд теңгеден асты.

Жедел іздестіру шарасын жүргізген полиция Түрксіб бекетінде 500 тонна бензин тиеп, Қырғызстанға аттанғалы тұрған сегіз цистернаны анықтады, жалпы құны 138 млн теңгеге тең жанармайды тәркіледі.

Қылмыстық іс сотқа жолданды. Тәртіп сақшылары Қылмыстық-процестік кодекстің 201-бабына сәйкес басқа ақпарат бермейді.