Басты бет → Жаңалықтар → 1169 ат күшіне ие Mercedes-AMG GT
1169 ат күшіне ие Mercedes-AMG GT

1169 ат күшіне ие Mercedes-AMG GT

Бұл кроссовер өзімен аттас электрлі жеңіл автомобильге балама болады.

8 сағат бұрын | | 19
Авторы: Манас Иксанов

Mercedes-AMG GT электрлі суперкарының тұсаукесерінен бір жыл өткен соң неміс өндірушісі дәл сол AMG.EA платформасына негізделген, дизайны ұқсас, атауында SUV қосымшасы бар кроссоверді таныстырды.

Фастбэктің төбесі аласа әрі қиғаш болса, кроссовердің шанағы екінші қатардағы жолаушылардың жайлы отыруына мүмкіндік береді. Жүксалғыш көлемі — 607–1740 литр. Клиренсі 130–160 мм арасында реттелетін пневмоаспаның арқасында қар басқан жол мен асфальт төселмеген жолға шығуға болады.

Базалық GT 53-тің күштік құрылымы жалпы 544 ат күшіне ие (800 Нм) екі мотордан тұрады. Қымбатырақ нұсқалары үш қозғалтқышпен жабдықталған: GT 55 агрегаты 816 ат күші мен 1860 Нм береді. Ал ең үздік GT 63 түрленімінің қуаты 1169 ат күші мен 2000 Нм-ге жетеді. Жаңа өнім моторының сипаттамаы атауында SUV қосымшасы жоқ Mercedes-AMG GT-мен бірдей. Бірақ кроссовердің аэродинамикасы нашарлау әрі салмағы ауыр болғандықтан (2.6–2.7 тонна), жеңіл автомобильдей жылдам емес. GT 63 SUV алғашқы жүздікті — 2.7 секундта, фастбэк 2.4 секундта еңсереді. GT 55 пен GT 63-тің ең жоғары жылдамдығы 270 км/сағ деңгейінде шектелген, ал GT 53-те бұл көрсеткіш — 250 км/сағ.

Mercedes-AMG GT SUV сыйымдылығы 106–128 кВт·сағ болатын аккумуляторы бар 800 вольтты архитектураға негізделген. Қымбат нұсқаларының батареясын 10-нан 80 %-ға дейін 12 минутта қуаттауға болады, ал 450 шақырым жүруге жететін қуат қорын жинауға 10 минут жеткілікті. Машинаның WLTP циклі бойынша жүріс қоры — 620–700 км.

Mercedes-AMG GT SUV AMG Performance 4MATIC+ толық жетек жүйесімен жабдықталған. Гидравликалық желілердің өзара байланысы арқасында кроссовердің аспасы экстремалды режимде лифтбэкке қарағанда қаттырақ жұмыс істейді. Кроссовер жылдамдық алғанда артқы бөлігі төмен тартпайды, ал тежеуіш басқанда алдыңғы жағы еңкеймейді. Үш комплектацияның бәрінде артқы дөңгелек басқарылады.

Салонда 10.2 дюймдік аспаптар панелі мен 14 дюймдік мультимедиа планшеті бар. Ал алдыңғы жолаушыға арналған 14 дюймдік жеке экран опция ретінде ұсынылады. Артқы диван үш адамға арналған, панорамалы шатырдың жарық өткізу деңгейін реттеуге болады.

GT 55 мен GT 63-те V8 мотордың, ал GT 53-те турботөрттіктің гүрілін имитациялайтын функция бар, сондай-ақ орындықтың дірілі мен рөл астындағы берліс қорабы тұтқасы жүргізушіге капот астында бензинді мотор тұрғандай сезім сыйлайды. Клиент Mercedes Manufaktur бағдарламасы арқылы автомобильді өз қалауынша жабдықтай алады.

Mercedes-AMG GT SUV саудаға 2027 жылы шығады. Бағасы қазірше белгісіз. Бірақ Батыс басылымдары GT 53-тің бағасы — 140 мың доллардан, ал GT 55 мен GT 63 құны 200–220 мың доллардан басталады деп болжап отыр.

Комментариев: 0

✖
Чтобы оставить комментарий, вам необходимо зарегистрироваться или авторизоваться.