Кедендік одақтың «Дөңгелекті көлік құралдарының қауіпсіздігі туралы» Техникалық регламентіне сай, 1 желтоқсаннан бастап жолда жазғы дөңгелекпен жүруге тыйым салынады. ҚР жол ережесінде де осындай талап бар.
Техникалық регламент бойынша қыстың аяғына дейін машина бүртабан дөңгелек немесе үш шыңы бар тау белгісімен таңбаланған, сондай-ақ «М+S», «M&S», «M S» (Mud and Snow — «балшық пен қар») белгісі бар дөңгелекпен жүруі керек.
Қысқы шинаны бір оське ғана емес, төрт дөңгелектің бәріне орнату қажет. Сондай-ақ ереже бойынша бір оське типі, өлшемі және протекторы әртүрлі шина орнатуға болмайды.
Ереже бұзғандар Әкімшілік кодекстің 590-бабы 5-бөлігі бойынша 5 АЕК (2024 жылы 18 460 теңге) көлемінде айыппұл төлейді әрі жүргізуші дөңгелегін ауыстырғанға дейін полицейлер машинаның нөмірін шешіп алады.
Полиция жазғы дөңгелекпен жүрген машиналарды ұстау үшін арнайы рейд өткізбейді, көлікті басқа себеппен тоқтатқан кезде шинаны тексеруі мүмкін. Сондай-ақ көшені патрульдеген кезде резеңкеге назар аударуы мүмкін.
Қысқы шина протекторының қалыңдығы кем дегенде 4 мм болуы керек. Бұдан аз болса, шина қысқы болса да жүргізуші техникалық регламентті бұзған болып саналады. Оның үстіне мұндай дөңгелекпен тайғақ жолда жүру өте қауіпті.
Комментариев: 0