Британиялық Bargain Cars басылымы 2001 жылы шыққан Volvo S80 жайлы жазды. Бұл автомобиль көпшілікті керемет сыртқы көрінісімен таңғалдырып отырған жоқ. Қайта жүрген жолының ұзақтығымен ел назарын аударған. 2,5 литрлік дизельді қозғалтқыш орнатылған седан бүгінге дейін 717 мың миля (1,1 миллион шақырым) жол жүрген.
S80-нің 20 жылда төрт иесі болған. Алғашқы иесі көлікті 2016 жылы ғана сатты. Volvo ғұмырының көп бөлігінде такси қызметінде болды. Алдымен VIP клиенттерді, содан кейін әуежайға жүргіншілерді тасыды. Басылым авторларының жазуынша, S80 алғашқы үш жылдың өзінде 643 000 км жүрген. Демек, ай сайын 18 мың шақырымды еңсеріпті.
Volvo қазір Bargain Cars паркінде тұр. Жақында журналистер көліктің жүрген жолын 750 мың мильге жеткізу мақсатында Ұлыбританияда тур өткізеді. Осыдан кейін олар елдегі осындай ұзақ жол жүрген өзге көліктерді іздеуге ниеттеніп отыр.
Анықтама үшін: Volvo S80 моделінің бірінші буыны 1998 жылдан 2006 жылға дейін шығарылған. Бұл көлік Қазақстанда да сатылады. Kolesa.kz сайтында 30-дан аса хабарландыру табуға болады. Бағалар 1,6-дан 4,6 млн теңгеге дейін. Көлік иелерінің көрсетуінше ең көп жүргені 400 мың шақырым.
Комментариев: 0