Қазақстанға электромобиль әкелудің құны қанша

Жанар-жағармай құнының күн санап өсуі себебінен, соңғы кездері экологиялық жағынан таза көлікке отыруға талпыныс сәнді көрінуден гөрі үнемдеуге тырысу әрекетіне айналып бара жатқандай. Бұл расымен де тиімді ме? Мән-жайын бірге анықтап көрейік.

Кедендік рәсімдеу

Электромобильді елге кіргізгеніңіз үшін әлі де кеден қызметкерлеріне ақы төлеу талап етіледі. Баж салықтары мерзімді түрде алынып тасталғанымен, бұл ұзаққа созылмайды, көп уақыт өтпей-ақ олар қайта сұралады. 2019 жылдың 6 қаңтарынан бастап электрлі қозғалтқышқа ие көліктердің барлығына (гибридтерді қоспағанда) салынатын баж салығының көлемі кедендік бағасынан (инвойста не сатып алу-сату келісімшартында жазылған бағаны, жеткізу және рәсімдеу құнын қоса алғанда) 3-тен 2 %-ға дейін төмендетілді. ДКҰ-ның келісімімен 2021 жылға қарай электромобильдерге салынатын баж салығының мөлшері 0 %-ды құрауы тиіс, бірақ әзірше төлем жасауға тура келеді.

ҚҚС (қосымша құн салығы)

Кедендік рәсімдеу шарасынан кейін ҚҚС-ын төлеу қажет, оның қазіргі мөлшері көліктің кедендік рәсімдеу мен кедендік алымды (декларация үшін 20 000 теңге не 46.69 еуро) қосқандағы кедендік құнының 12 %-ына тең.

Болашақта ҚҚС және бастапқы рәсімдеу үшін талап етілетін алымды электромобильдерден алып тастау жоспарланып отыр. Алайда заңға бұл өзгерістің қашан енгізілетіні белгісіз. Қазіргі таңда іске асып отырған жалғыз жеңілдік — тек электрлі қозғалтқышпен жабдықталған жеңіл көліктерге көлік салығының салынбайтындығы.

Эвак

Апат кезінде шұғыл хабарлау жүйесін көлікке орнату құны — 189 000 теңге. Онсыз Көлік құралы құрылымының қауіпсіздігі туралы куәлікті алу мүмкін емес, сәйкесінше бастапқы рәсімдеуден де өте алмайсыз. Әзірге көліктерге тек ресейлік өндірістен шыққан «батырма» ( қазақстандық өнім жуырда пайда болады) орнатылуда. Содан кейін жүйенің орнатылғаны және қосылғаны туралы анықтама береді, онымен сіз аталған куәлікті алу үшін сертификациялау орталығына аттанасыз. Қызықтың бәрі осы жерде басталады. Куәлікті тек бұрында көлік құралының типін мақұлдау құжатын (КҚТМ) алған көлікке ғана рәсімдеуге болады! Көлік құралы құрылымының қауіпсіздігі туралы куәлікті рәсімдеу үшін орта есеппен 50 теңгеге тең қаражат жұмсауға тура келеді.

Утилизациялық алым

Елдегі экологияны қорғау жөніндегі шенділердің бітпейтін бос әңгімелеріне қарамастан, электромобильдер үшін әлі де утилизациялық алым төлеу талап етіледі. Оның мөлшері басқа көліктермен салыстырғанда төмендеу әрине, дегенмен тым аз деп те айта алмаймыз, себебі оның көлемі 150 АЕК, яғни 378 750 теңгеге тең.

Тіркеу үшін төленетін алым

Темір тұлпарды бастапқы есепке қою үшін оның иесіне тек тіркеу алымын төлеу жеткілікті. Екі жасқа дейінгі жаңа электромобиль үшін 0.25 АЕК не 631.25 теңге беру қажет. Екіден үш жасқа дейінгі көліктерге — 25 АЕК не 63 125 теңге, ал одан ескілеу көліктер үшін 250 МРП не 631 250 теңге төленеді.

Орташа есеп

Сіз Еуропадан (бірақ қайдан алғаныңыз маңызды емес) құны 20 мың еуро тұратын 2017 жылғы Nissan Leaf көлігін алдыңыз делік. Тым ескі көліктерді қарастырудың мәні жоқ, себебі батареяның қызмет ету мерзімі әдетте жеті жылдан аспайды (дегенмен, бөлшектерді кез келген уақытта ауыстыруға болады). Көлікті Қазақстанға жеткізу үшін шамамен 1 500 еуро жұмсайсыз. Ал оның үстінен шетелде қанша төлеу қажет болатынын құдай біледі.

* 1 еуро = 428.1 теңге. 07.02.2019 ж. курс бойынша

Сонымен, батареясы судай жаңа Nissan Leaf көлігінің құны 25-26 мың еуро, яғни 11 млн теңгеге тең. Бұл жаңа көлікке қатысты айтқанда жаман емес, әрине. Ал егер ол үшін салық төлеудің қажет болмайтынын, әрі электр энергиясының бағасы мен жанармай бағасын салыстырар болсақ, бұл өте жақсы таңдау дер едік. Онда да, егер сіз қала аумағында не қуаттау станцияларының маңайында жүретін болсаңыз ғана, әрине.

Сапарыңыз сәтті болсын!