2018 жылдың шілде айының орта тұсында Тольяттидегі зауытта соңғы LADA Priora шығарылды. Бұл оқиғамен үлгінің 11 жылдық тарихы аяқталды. Ойлап көріңіздерші, бұл көлік конвейерге сонау 2007 жылы алғаш қойылған еді, ал оның әзірлемесі одан бұрын — 1990 жылдардың соңында басталған болатын. Барлығы сонау 80-жылдары бастау алған.
LADA Priora. Бастамасы
90 жылдар. АВТОВАЗ тек жуырда ғана оныншы үлгіні шығарды, және бұрынғы КСРО жүргізушілері үшін бұл таңсық дүние. Көп күттірген, шала болса да сондай сүйкімді. Алайда, зауыттың конструкторлық және дизайнерлік бюросы «ондықты» жаңарту үшін қарқынды жұмыс істеп жатты. Жоспарда тек жарық шамдар мен бамперлерді жаңарту ғана емес, 2110 көлігінен жаңа көлік жасау болатын. Осылай ВАЗ-2170 пайда болды. Иә, оны бірден «Приора» деп атаған жоқ.
Автокөліктің Prioritet деп аталуы әбден мүмкін еді. Бұл атауды BBDO жарнама агенттігінде таңдаған болатын, бірақ ол зауыттың маркетинг бойынша директоры Александр Бредихиннің тексерісінен өтпей қалды. Топ-менеджерге сөз тым ұзын, әрі «Лада» деген атаумен үйлеспейтіндей көрінген.
Сыртқы пішінінің соңғы нұсқасын дизайнерлер 2001 жылы жасады. Бұған дейін олар көптеген нұсқаларды қарастырған еді. Тіпті ВАЗ-2170-ке аса бас қатырмай, «Шниваның» жарық шамдарын орната салу туралы да идеялар айтылған. Қуанышқа орай, одан бас тартты.
Салонның редизайнын жасау оңай болған жоқ. Көліктің тәжірибелі үлгілерінің интерьерін АВТОВАЗ қызметкерлері жасап, бұл нұсқаны Status деп атады. Ал сериялық көліктердің салонын италиялық Carcerano Creative Engineering компанясына сеніп тапсырған. Айырмашылығына баға беріңіздерші.
ВАЗ-2170 шанағындағы седанды көпшілікке 2003 жылы Мәскеу қаласындағы автосалонда таныстырды. Бір жыл өткеннен кейін Priora атаулы хэтчбектің концепті таныстырылды. Бүкіл топты «Приора» деп атай бастады.
Үлгі конвейерге бірден жеткен жоқ. Бекітілген топтамасын тек 2006 жылы құрастырса, ал сериялық көліктердің өндірісін 2007 жылдың көктемде бастады. Алғашқы бірнеше жылда жаңа 2170 ескірген 2110-мен бір уақытта шығарылып отырды. Бұл 2009 жылға дейін жалғасқан еді.
Седан, хэтчбек, универсал және… купе?
Стандартты үш нұсқасынан бөлек, LADA Priora-ның үш есікті шанаққа және Coupe деген атауға ие модификациясы да болды. Үлгі аз сериялы болатын. Ол 2010 жылдан 2015 жылға дейін шығарылды. Осы бес жыл ішінде АВТОВАЗ-дың тәжірибелік және өнеркәсіптік өндірісінде 2.5 мыңнан аса данасы шығарылыпты.
«Приора» купесі Sport нұсқасының болғанына қарамастан, айрықша ширақтықпен ерекшелене алмады. Үш есіктінің капотының астында сол басқа түрлеріндегідей, 16 клапанды 1.6 литрлік мотор болды.
11 жылда не өзгерді
Өндірістік жылдарда LADA Priora аса өзгере қойған жоқ. Егер екі автокөлікті қатар қойып қараса, алғаш шыққан көлікті конвейерден бірнеше ай бұрын ғана шыққан көліктен ажырату әркімнің қолынан келе бермейді.
Рестайлинг «Приора» тарихында бір-ақ рет болған. 2013 жылы оны жаңа бамперлермен, басқа айналармен және күндізгі жарық шамдарына ие негізгі оптикамен жабдықтады. Ал артқы жағындағы барабанды тежегіштер ешқайда кеткен жоқ. Айтпақшы, олар алюминийден жасалған. Қазір автокөлік индустриясында мұндайды ешкім жасамайды. Себебі шойыннан жасалғандары жеңілдеу әрі арзандау.
Желіде бірнеше мәрте LADA Vesta пайда болғаннан кейін, икс-фейске Priora да ие болады деген ақпарат тараған еді. Бөгде тюнинг-ательелер тіпті соған ұқсас дизайнның кейбір элементтерін өз туындыларында жобалап көрген болатын. Алайда, ресми рестайлинг болған жоқ.
Техникалық жағынан өзгерістер әлдеқайда көп болды. Олартың көбі көзге түсерлік дәрежеде. Инженерлер дыбыс оқшаулауын жақсартты, аспасын біраз тінтіп, қауіпсіздігін арттырды және т.б. жұмыстар атқарды.
Дегенмен маңызды жаңа енгізілімдер де болды:
2011 жылы LADA Priora-ға ГЛОНАСС навигациялық жүйесін орната бастады;
2013 жылы опциялар тізімінде курстық орнықтылық (ESC) жүйесі пайда болды;
2013 жылы топтық жиынтықтағы көліктерге бүйірлік қауіпсіздік жастықтарын орната бастады. Бұған дейін тек екі эйрбэг болатын. Айтпақшы, олар алғаш дәл осы «Приорада» пайда болған еді;
2014 жылы LADA Priora өзіндік өндірістегі роботталған АМТ қорабы бар алғашқы ресейлік автокөлік болды;
2015 жылы Priora-да берілістерді ауыстырудың жигулилік бүктемесі пайда болды. Артқысы — оңға және артқа.
LADA Priora автоспортта
«Приораның» спорттағы жетістіктері ауыз толтырып айтуға келмейді. Әлемдік аренада көлікті тек шанақтық жарыстар бойынша WTCC әлемдік чемпионатында қолданған. Болид 2009 жылғы маусымның бір бөлігін жүріп өтіп, тек аңызға айналған итальяндық «Имолада» Джеймс Томпсон қанжығасына байлаған екі алтыншы орынмен ғана есте қалды.
Бұл тұста үлгіде ресейлік седаннан тек шанақтың артқы бөлігі қалғанын ескерте кеткен жөн. Жасаушылар қозғалтқышты Opel-ден алған. Бұл 275 күш беретін 2 литрлік төрттік болатын, ал қорапты Hewland компаниясынан сатып алған. Бұл 6 сатылы жұдырықшалы секвентал еді.
Төмендетілген «приоралар»
Автоспортта LADA Priora айтарлықтай жетістікке жетпесе де, көшедегі жастар арасында аса танымал. Төмендетілген седандар мен хэтчтер барлық жерде кездеседі.
Төмендетілген үлгілер шетелдік Stance қозғалысы сияқты бір философияны қалыптастырды. Тек оның жергілікті нұсқасы БПАN (БезПосадкиАвто.NET) деп аталады.
LADA Priora тюнингінің жекелеген бөліктері тіпті көптеген мемдер туындатты. Мұның жарқын мысалы — My Life My Rules жапсырмасы бар көліктер.
Priora Қазақстанда
Ресей Федерациясы LADA Priora-ның жалғыз өтімді нарығы емес, автокөлік Қазақстанда да аса танымал болды. Жақсы жылдарда ай сайын екі мыңнан аса көлік сатылатын, бұл үлгінің 2009 және 2014 жылдар аралығында елдегі ең көп сатылатын көлік аталуына мүмкіндік берді. Бірақ Қазақстанда ол Priora деп аталған жоқ. Мұнда төбесінде тек зауыттық индекстер жазылып тұрды: 2170, 2171, 2172.
«Приораның» Қазақстандағы тарихы біршама ерте аяқталған еді. 2016 жылдың соңына таман көліктер автосалондардан жоғала бастады. Өскемендегі «АЗИЯ АВТО» зауыты көлік құрастыруды бастауды жопарлағандықтан, дайындарын жеткізу тоқтатылды. Бірақ нәтижесінде, өндіріс бастау алған жоқ, оны тым қымбат деп есептеген, және дилерлік орталықтарға үлгі сол күйі қайта оралмады.
LADA Priora, қош бол!
LADA Priora өндірісін доғару 2015 жылы басталған еді. Ол кезде алдымен конвейерден купе нұсқасы, ал жыл аяғында хэтчбектер мен универсалдар түсірілді. «Приораның» мүлде шығарылмайтыны туралы сыбыстар бірнеше рет шықан еді. АВТОВАЗ басшылығы соңғы сөзін 2018 жылдың мамыр айында айтты — үлгінің ақыры келді.
Дегенмен, тіпті бұдан кейін де LADA Priora-ның тағдырына байланысты күдіктер сейілмеді. Шілде айының басында Росстандарт базасында «Приораға» жаңа Көлік құралының типін мақұлдауды (КҚТМ) тапқан болатын. Құжатқа сай, үлгінің сертификациясын 2019 жылдың 6 желтоқсанына дейін ұзартқан екен. Кейін белгілі болғандай, бұл бар болғаны сертификациялық органның қателігі болып шықты.
Өзінің 11 жылдық тарихында LADA Priora бір миллионнан астам тиражбен сатылыпты. Миллионыншы автокөлікті үлгіні шығару басталғаннан тура он жыл өткеннен кейін, 2017 жылдың 11 сәуірінде шығарған.
«Приораның» соңғы шанағын зауытта 2018 жылы 11 шілдеде әзірлеген. Желіде оның сүйегінің фотосуреті таралды. Седанның ақ түсті соңғы данасын сәрсенбі күні, 18 шілдеде құрастырды. Онымен не істейтіні әлі белгісіз, тек бір нәрсе анық: осымен Қазақстан мен Солтүстік Кавказдағы ең танымал жаңа автокөліктердің бірінің тарихы аяқталады.
LADA Priora, жаның жай тапсын.
Комментариев: 0