Bertone ательесі әрлеген Fiat X1/9

1969 жылы Турин автосалонында Bertone ательесі әйгілі Марчелло Гандинидің қолынан шыққан Autobianchi A112 Runabout-ты таныстырды. Концепт бір-екі жылдан кейін шанағы тарга (шатыр панельдері алынатын купе) типті Fiat X1/9 моделіне айналды.

Стильді, үнемді әрі жақсы қозғалатын екі есікті Fiat X1/9 бірден халықтың көңілінен шықты. 1972-1989 жылдары жарық көрген 160-нан аса көліктің үштен ексісі АҚШ-қа жол тартты.

Одан бері талай жыл өтті. Fiat көптен бері X1/9 сияқты модельдер өндірмейді. Ал Bertone ательесі Нуччио Бертоненің қазасынан кейін дизайнерлік қызметін тоқтатып, 2014 жылы тіпті банкрот болды. 2020 жылы ателье басшысының немерелері Мауро мен Жан-Франк Риччи брендті сатып алып, кезінде атағы жер жарған фирмаға қайта жан бітіруге күш салып келеді.

2022 жылы желтоқсанда Bertone әйгілі Lamborghini Huracan-ға негізделген GB110 гиперкарын көрсетті, шанағы мен интерьері өзгерген машина қайта өңделген пластиктен жасалған синтетикалық отын тұтына алады. Шеберлер біреуі екі миллион еуро тұратын автомобильдің 33 экземплярын құрастырып жатыр.

1 / 11

• 
• 
• 
• 
• 
• 
• 
• 
• 
• 
• 

1 / 11

Биыл қаңтарда ателье Fiat X1/9 бен түпнұсқа концептінің құрметіне Bertone Runabout моделін ұсынды. Андреа Мочеллин шағын шанақтың ательеге тән сына тәрізді пішінін асқан шеберлікпен айқындаған. Ені екі метрге, ұзындығы төрт метрге жуық машинаның дөңгелек аркасы сүйірленіп, капоты жерге жақындап қалған. Мамандар сыртқы панельдерін жасағанда да карбон қолданған.

Бұл жолы донор болған Lotus Exige қос иінтіректі аспа, реттелетін амортизаторлар мен тұрақтандырғыштар, Toyota өндірген, 6 сатылы механикамен жұмыс істейтін 3.5 литрлік V6 2GR-FE компрессорлы мотордан тұратын платформасын бөлісті. Күштік құрылым жалпы 468 ат күші мен 470 Нм момент береді.

1057 келі тартатын Bertone Runabout алғашқы жүздікті 4.1 секундта еңсереді, ең жоғары жылдамдығы 270 шақырымға жетеді. Дөңгелек дискілері 225/40 ZR18 (алдыңғы) және 295/30 ZR19 (артқы) өлшемді шинамен қапталған.

Фрезермен өңделген алюминиймен әрленген табиғи былғарымен қапталған салонда көмекші жабдықтар аз, бірақ ықшам әрі сондай жайлы көрінеді. Біздің заманнан екенін цифрлы аспаптар панелінен байқайсыз. Торпедоның ортасындағы компас көлік моторлы қайықтардың бір түріне берілген Runabout атауын бекер алмағанының айғағы.

Клиенттер әлдеқайда қолайлы тарга шанағы мен табиғаттың тосын мінезінен еш қорғалмаған баркеттаның бірін таңдай алады. Дегенмен көп адам біріншісін жөн көретіні анық.

Bertone Runabout қолжетімді модель деуге ауыз бармайды, небәрі 25 данасы шығатын машинаның құны 390 мың еуродан асады. Ал 1970 жылдары Fiat X1/9 3-5 мың долларға бағаланған.