1 қаңтар күні көлік жүргізген дұрыс па

Мерекелік дастарқаннан дәм татып, кешті көңілді өткізген соң көп адам тауға жол тартады. Тағы көңіл көтеруге аттанар алдында кешегі кештің лебі кетпей тұрып, көлік тізгіндеген дұрыс па, ойланыңыз.

Рұқсат берілетін промилле бар ма?

Кей жүргізуші бір-екі сағаттан кейін қандағы алкогольдің ізі де қалмайды, қалғаны болса, есепке алынбайды деп ойлайды. Сол себепті полиция ұстаған күнде де жазға тартылмайтынына сенімді.

Көп адамның пікірі осындай. Алайда бір гәп бар: Қазақстанда «рұқсат етілген» промилле деген түсінік жоқ. Бұрын медициналық тексеріс ережесінде ағзада 0.5-1.5 промилле алкоголь болса, аздап мас деп қаралады деп жазылатын. Яғни, алкотестер 0.5 промилледен аз көрсеткенде жүргізуші мас емес деп танылды. Бірақ 2020 жылы билік бұл норманы алып тастады, енді алкотестердің нөлден жоғары көрсеткіші тәртіп сақшысына мас күйде көлік айдау туралы сөйлесіп, жүргізушіні жаяу жүргіншіге айналдыруға мүмкіндік береді.

Сол себепті той тойлаған соң рөлге отырмаған абзал. Полиция айыппұл жазбаса да, әуреге салып, көңіл-күйіңізді түсіруі мүмкін.

Бұл мақалада бір бокал көкқайнарды сілтеп салып, көлік жүргізу туралы сөз етіп отырған жоқпыз. Мұның жақсы ой емес екенін бәрі біледі.

Қане, үрлеңіз!

Жүргізуші ертеңінде көлік тізгіндеп, патрульдің көзіне түссе ше? Біз бірнеше маңызды сәтті атап өткен осы мақаланы есте ұстауға не смартфонға сақтап қоюға кеңес береміз.

1. Тексерістен бас тартуға болмайды. Әкімшілік кодекстің 613-бабына сәйкес 15 тәулікке қамалып, 8 жылға куәлігіңізден айырыласыз. Бұл мас күйде машина айдағаннан ұзақ.
2. Куәландыру екі куәгердің қатысуымен жүзеге асады. Трассада не қала сыртында тоқтатса, тексеріс процесі басынан аяғына дейін видеоға жазылады. Тәртіп сақшыларының кеудесінде бейнетіркеуіш бар. Жүргізуші де жазып алуға құқылы, бірақ алдымен полицейге ескерту керек.
3. Орган қызметкері алкотестерге бір реттік мундштук қолдануға тиіс.
4. Полиция тек сертификатталған алкотестер пайдалануға міндетті. Біздің елде бұл тізімде Dräger Alcotest 6000, Dräger Alcotest 7000 және Dräger Alcotest 5820 бар. Ал жапондар жасаған AMU-Z, AC-016 және AC-015 модельдерінің сертификаты 2022 жылы күшін жойған. Алкотестер сертификат алғанын ҚР мемлекеттік өлшем жүйесі порталындағы «Өлшеу құралдарының бекітілген типтері» бөлімінен қарауға болады. Басқа құралдар заңсыз.

5. Алкотестердің мерзімі өтпегені де маңызды.

Тексеріс нәтижесімен келіспесеңіз не жоғарыда аталған шарттар сақталмаған жағдайда жүргізуші оны хаттамада көрсетіп, жазбаша түрде өзін медициналық мекемеде тексеруді талап етуге құқылы.

Алкотестер көрсеткіші ментол қосқан темекі шеккенде, дәрі қабылдап, квас, сүтқышқылды өнім не энергетикалық сусын ішкенде ауытқуы мүмкін. Ал полицейлер хаттама толтырып, куәліктен айыру үшін кез келген мүмкіндікті пайдаланады. Тіпті ақша алу үшін қорқытып-үркітетін жағдайлар талай болған.

Алкотестер көрсеткіші бұл істегі ең маңызды фактор емес!

Біртүрлі көрінсе де, жол ережесі аузынан арақтың иісі мүңкіп тұрған азаматтың көлік жүргізуіне тыйым салмайды. Заң алкогольге не есірткіге мас күйде ғана темір тұлпар тізгіндеуге тыйым салады. Жүргізушіден ішімдіктің иісі шығып тұрғанмен сау екені көрініп тұрса, ереже бұзған болып саналмайды. Мұндай жағдайда соңғы үкімді кешенді тексерістен өткізген медицина қызметкері ғана шығара алады.

Сонымен қатар ауаға үрлегенде анықталған алкоголь мөлшері қорытынды шығаруға негіз болмайды, ол тек қосымша құрал ретінде қолданылады.

Жүргізушінің мастығын анықтайтын тексерісті мамандар былай жүргізеді:

• Жүргізушінің сау не мас екені туралы сараптама қорытындысын дәрігер арнайы сынақтар өткізіп, сынама алу арқылы клиникалық зерттеу жүргізгеннен кейін береді. Маман жасайтын тұжырым адамның жай-күйіне байланысты. Ол көзінің қарашығына, қолының діріліне, одан кейін тепе-теңдік сақтау қабілетіне, жалпы өзін ұстауына мән береді.
• Зертханалық тестермен қосымша анализ алады.
• Дау туындаса, қан не зәр талдауын жасайды.

Тексерістен кейін төрт түрлі қорытындының бірін шығарады:

• Сау.
• Психобелсенді зат қолдану дерегі анықталды, бірақ масаю белгілері жоқ; (Сау деген сөз, әкімшілік жауапқа тартпайды – Kolesa.kz ескерт).
• Алкогольге мас болу (жеңіл, орташа, ауыр деңгей).
• Психобелсенді заттар (есірткі — опиоидтер, каннабиноидтер, кокаин, седативті заттар, психоынталандырушылар, галлюциногендер, ұшпа еріткіштер) қолдану нәтижесінде пайда болған масаю жағдайы.

Егер дәрігерлер жүргізуші мас деп шешсе, екі сағат ішінде тәуелсіз сараптамадан өтіп, шешім дұрыс емес екенін дәлелдеуге мүмкіндк бар. Бұл процесс тек мемлекеттік мекемеде өтуге тиіс.

Мереке күні сәтті сапар тілейміз!

Мүмкіндік болса, кешкі отырыстан кейін көлік жүргізбеңіз.