Санкт-Петербургтегі Toyota зауыты жабылып, RAV4 өндірісі тоқтағаннан кейін компания өкілдері кроссоверді Қазақстанға әкелетін басқа жол тапты. Енді модель біздің елге тікелей Жапониядан келеді. Машина 2022 жылдың аяғында сатылымға шығады, бағасы да белгілі.
Сырттай өзгеріс аз, дегенмен түс гаммасына жаңа реңк қосылды. Енді хаки және сұр түсті таңдауға болады.
Негізгі өзгеріс салоны мен капот астында. Енді көлік бұрынғы қозғалтқыштан (149 күш) едәуір қуатты (173 күш) 2 литрлік атмосфералы мотормен жүреді. Ол вариатор және толық жетекті жүйемен жұмыс істейді. Салонда Android Auto (сымды) және Apple CarPlay-мен (сымсыз) жұмыс істейтін 10.5 дюймдік медиажүйе экраны мен 12.3 дюймдік цифрлы аспаптар панелі назар аудартады.
Прайс-листе «Престиж», «Престиж+», «Люкс» және «Люкс+» сияқты төрт комплектация бар екені жазылыпты.
Ең қарапайым «Престиж» нұсқасы 19.8 млн теңге тұрады. Мұндай машинада 18 дюймдік дөңгелек дискісі, толық жарықдиодты оптика, электр жетегі бар жүксалғыш қақпағы, жеті қауіпсіздік жастығы, электронды көмекшілердің базалық жинағы, артқы көрініс камерасы, цифрлы аспаптар панелі және 10.5 дюймдік медиажүйе экраны, кілтсіз ашу жүйесі, екі аймақты климат-бақылау, жылытуға болатын алдыңғы орындық және т. б. бар. Салоны матамен қапталған, рөлі мен орындығы қолмен реттеледі.
Жапонияда жасалған жаңа Toyota RAV4-тің комплектациясы туралы толық ақпаратты Kolesa.kz қосымшасындағы «Жаңа автокөліктер» бөлімінен көруге болады.
«Престиж+» алысқа түсетін жарықты автоматты басқару, бейімді круиз-бақылау, жол белгісін тану, автоматты тежеу және жүргізуші жағдайын бақылау жүйесін қамтитын TSS+ кешенімен ерекшеленеді. Мұндай машинаны 20.2 млн теңгеге аласыз.
«Люкс» түрленімі 21.8 млн теңгеге сатылады. Мұндай көлік прожекторлы жарықдиодты шам, 19 дюймдік дөңгелек дискісі, былғарымен қапталған салон, жылытуға болатын артқы орындық, электрлі реттелетін алдыңғы орындық, смартфонды сымсыз қуаттау және көрінбейтін аймақты бақылау жүйесімен жабдықталған. Ал ең үздік «Люкс+» жиынтығында TSS+ кешенінен бөлек, алдыңғы әйнекті толық электрлі жылыту, айнала шолу камерасы және навигация жүйесі бар. Бағасы — 23 млн теңге.
Күншығыс елінен келген RAV4 Санкт-Петербургте шыққан машинадан сәл қымбаттау. Көктемде Ресейде құрастырылған модельдің бағасы 16.8–23.5 млн теңге болған. Бірақ бұрынғы кроссовердің арзан нұсқасы өте қарапайым болғанын айта кеткен жөн. Өзара ұқсас Ресейде жасалған Style жиынтығы мен Жапонияда шыққан «Престиж» нұсқасын салыстырсақ, бағасы аса көп өспегенін көреміз, алдыңғысы 19.4 млн болса, жаңасы 19.8 млн теңге тұрады.
Комментариев: 0