Жақында жолдың қарсы бетімен жүріп, полицияға «Жұмабектің бажасы» екенін айтқан жүргізушінің видеосы тарады. Кейін видеода аты аталған Жұмабектің Отырар аудандық полиция бөлімінің Әкімшілік полиция бөлімшесінің бастығы Жұмабек Төлеген екені анықталды.
Оған қатысты қызметтік тексеріс жүргізілді. Нәтижесінде Мемлекеттік қызметшілердің Әдеп кодексін және Полиция стандарттары туралы бұйрықты бұзғаны үшін полиция майоры Жұмабек Төлеген лауазымды қызметінен босатылды. Бірақ ол жұмыстан шығарылған жоқ. Бұл туралы Tengrinews.kz сайты Түркістан облысы ПД баспасөз қызметіне сілтеме жасап хабарлады.
Жол ережесін өрескел бұзған жүргізуші де табылып, оның атына бірнеше хаттама толтырылды. Атап айтқанда, «көлік құралын жолдың жүру бөлігінде орналастыру, қарсы жүріп өту немесе басып озу қағидаларын бұзу» және «Полиция қызметкерлерінің талаптарын орындамау және алкогольдік, есірткілік мас күйін куәландырудан жалтару».
Айта кетейік, «Жұмабекке қоңырау шалу» оқиғасы әлеуметтік желіде қызу талқыланды. Тіпті бұл сөз қазірдің өзінде көп әзілге тұздық бола бастады.
Комментариев: 0