Жыл басталғалы Алматыдағы 500 люктің қақпағы ұрланған

Қазір кәріз қақпағын жиі қолды қылады деді әкімдіктегілер. Биылдың өзінде қаскөйлер 500 люкке қырғидай тиген. Бірнеше күн бұрын Медеу ауданында жаңбыр суын жинайтын резервуардың торын ұрлаған жігіттер ұсталды. 1990-2000 жылдары кәріз ұрлығы шарықтап тұрған кезде темірді қайта өңдейтін орындарды полицейлер қатаң бақылайтын. Ал темір арасынан кәріз қақпағы табылса, ұрланған дүниені сатып алғанмен бірдей жазалаушы еді. Қазір қылмыскерлер не себепті жауапқа тартылмайтыны белгісіз.

Шенділер қала көшелеріне «қалқыма» люк орнатып жатқанын мәлімдеді. Былтыр оны Достық, Назарбаев, Абай даңғылдарына және Қабанбай батыр көшесіне қойып көрген, ал биыл 943 люк Райымбек, Төле би, Шаляпин, Дулати, Науаи, Қалдаяқов, Шевченко, Құрманғазы, Қабанбай батыр, Майлин, Бекмаханов, Сүйінбай және т.б. көшелерге орнатты.

Алматы көшелері мен тротуарларда су, жылу, газ тарататын мекемелер мен телефон желілеріне тиесілі 40 мың құдық бар.