2020 жылы наурызда Қазақстанда төтенше жағдай жарияланып, сәуір айынан бастап жаңа машиналардың сатылымы тоқтады. Бұған теңге бағамының күрт құлдырауы қосылды. Сөйтіп жұрт қолдан көлік алуға көшкенде сатушылар орайды пайдаланып, машина бағасын қымбаттатып жіберді.
Мамырда жаңа автомобиль нарығы жандана бастады. Бірақ жаңа машина тапшылығы басты проблемаға айналды. Бұл жүрілген көліктердің одан әрі қымбаттауына түрткі болды. Біз танымал машиналардың 2020 жылғы 1 сәуірден 2021 жылғы 1 сәуірге дейінгі баға өзгерісін бірнеше сегментте талдадық.
3 миллион теңгеге дейін
3 миллионнан арзан көліктер қатарында ВАЗ-2114, Audi 100 (C4) және Volkswagen Passat B3 бар. Мұнда «төрттік» сәл жаңа болғанымен, Audi мен Volkswagen 30 жаста.
ВАЗ-2114
2020 жылы сәуірде 2013 жылғы ВАЗ-2114 орта есеппен 1 569 500 теңге болған, ал қыркүйекте құны 1 639 200 теңгеге жетті. Қазан айында шамалы (-1,1%) төмендеген соң қайта қымбаттап, 2021 жылы 1 сәуірде «төрттіктің» бағасы 1 710 500 теңге болды. Ең жоғары көрсеткіш ақпан айында байқалды. Сол кезде Қазақстанда тіркелген автокөлік үшін 1 722 300 теңге сұралған. Айта кетерлігі, Қазақстанда сатылымға шығарылған ВАЗ-2114-тің көбі ресейлік нөмірмен жүр, олардың бағасы сәл арзан. Бірақ қазір олар да қымбаттап, Қазақстанда тіркелген машиналарға жақындады.
Audi 100 C4
2020 жылы сәуірде 1 411 000 теңге болған 1991 жылғы Audi 100-дің бағасы 12 айда 11,8 %-ға қымбаттап, биыл сәуірде 1 577 800 теңгеге жетті. Бұл модельдің құны ең шарықтаған кез — 2021 жылдың қаңтары. Жыл басында машина 1 587 300 теңгеге бағаланды. Демек C4 қазір қаңтармен салыстырғанда 0,6 %-ға арзан деген сөз.
Volkswagen Passat B3
B3 индексті Volkswagen Passat Алматы жолдарында сирек кездеседі. Бірақ 1991 жылы шыққан машина соңғы 12 айда едәуір қымбаттады. 2020 жылы сәуірде Passat-тың орташа бағасы 980 200 теңге болса, 2021 жылы 1 сәуірде 1 101 400 теңгеге жетті (+12,4 %).
3 миллионнан 6 миллионға дейін
3-6 млн теңге тұратын көліктер санатына Hyundai Accent, Kia Rio және Toyota Camry XV40 жатады.
Hyundai Accent
Hyundai Accent (2014 жылы шығарылған) сәуірдің басында 4 миллион теңгеден сәл қымбат бағаланды. Шілдеден бастап баға айына 1,4-2,2 %-ға өсіп, 2021 жылы қаңтарда 4 452 900 теңгеге жетті. Бұл баға наурыз айына дейін сақталды. Ал 2021 жылы 1 сәуірдегі орташа бағасы 4 438 000 теңге болды. 12 айда Accent 9 %-ға қымбаттады.
Toyota Camry XV40
Бұл баға өлшеміндегі ең танымал Camry — 2007 жылғы модель. Былтыр сәуірдегі орташа бағасы 4 660 200 теңге болған. 2021 жылы сәуірде 5 375 100 теңгеге өсті (+15,3 %). Соңғы бірнеше айда седанның бағасы айтарлықтай өзгерген жоқ.
Kia Rio
Kia Rio да отандасы Accent-тен кем түспей қымбаттады. Бір жылда машинаның орташа бағасы 4 028 900 теңгеден 4 596 600 теңгеге өсті. Седанның құны ай сайын жоғарылап отырды, бірақ биыл наурыздан бастап сәл арзандай бастады.
6 миллионнан 9 миллионға дейін
Бағасы 6-9 млн теңге тұратын көліктер тізімінде де Toyota Camry бар, бірақ ол XV50 индексімен. Одан бөлек Сorolla мен Lexus RX 330 кроссовері де осы баға өлшемінде.
Toyota Camry XV50
2012 жылғы Toyota Camry 12 айда 12 %-ға қымбаттап, бағасы 7 504 600 теңгеден 8 403 000 теңгеге жетті (+11.9 %). Демек миллионға жуық өсті деген сөз. Егер осы қарқынмен қымбаттай берсе (айына +0,7 %), бірнеше айдан кейін бағасы 8.5 миллионнан асады.
Toyota Corolla
2013 жылғы Toyota Corolla (E170) 562 900 теңгеге қымбаттап, 6 191 400 теңгеден саудаланып жатыр. 2020 жылы сәуір-қараша аралығында модельдің бағасы 30 мың теңгеге өскен, ал үлкен өсім былтырғы қараша мен 2021 жылғы қаңтарда байқалды. Екі айда орташа құны 6 миллионнан асқан машинаның бағасы әлі өсуін тоқтатпады.
Lexus RX 330
Lexus RX330 — бұл тізімдегі жалғыз кроссовер. Үлгі ретінде біз 2004 жылы шыққан көлікті алдық. 2020 жылы аналитика оның орташа құнын 6 033 900 теңге деп көрсеткен. Бір жылдан соң бұл сома 6 885 800 теңгеге (13.1 %) жетті. 12 айдың ішінде машина ай сайын 0.3-тен 2 %-ға дейін қымбаттады. Тек былтыр қараша-желтоқсан айларында 3.2 % өсім көрсетті.
10 миллион теңгеден жоғары
Тізімдегі анағұрлым қымбат категория бағасындағы өзгеріс Camry XV70 седаны мен LC Prado және Land Cruiser 200 модельдерінен байқалды.
Toyota Camry XV70
2019 жылы шыққан жап-жаңа седанның құны 13 169 200-ден 13 820 500 теңгеге (+4.9 %) артты. 2020 жылдың шілдесі мен желтоқсанына дейін бағасы мың құбылған «жетпісінші» модель қымбаттауын жалғастыруда. Биыл ақпан-наурызда ғана сәл арзандады.
Toyota Land Cruiser 200
2008 жылғы Land Cruiser 200 қазір 14 233 600 теңгеге сатылып жатыр, бұл өткен жылғы бағадан 16.1 %-ға жоғары. Жол талғамайтын көліктің құны өткен шілдеден бастап шарықтай бастады. Ай сайын 3 %-ға қымбаттаған машина бағасының өсімі жыл басталғанда сәл бәсеңдеді. Алайда Land Cruiser 300-дің нарыққа шығуы алдыңғы буын өкілінің де құнына ықпал етуі әбден мүмкін.
Toyota Land Cruiser Prado
Прадик те 12 айда кәдімгідей қымбаттап,1.5 млн теңге өсім көрсетті. Бір жыл бұрын 8 488 100 теңгеге сатылған машинаны енді 10 040 500 теңге жұмсап алуға болады. Кестеден оның 2020 жылы қыркүйек пен қазан айларында күрт қымбаттағаны байқалады. Ол кезде LC Prado-ның құны 6 %-ға өскен, кейін бір ай сәл тұрақтады да, құны қайта артты.
Kolesa.kz сайтындағы аналитика деректерінен 2020 жылғы сәуір мен 2021 жылғы сәуір аралығында елде үлкен сұранысқа ие модельдердің біреуі де арзандамағанын көруге болады, керісінше, бәрінің бағасы 10 %-ға өскен. Ал Toyota маркалы Camry XV40, Land Cruiser 200 және Land Cruiser Prado модельдері 15 %-ға қымбаттады.
Комментариев: 0