Жүргізушілерді медициналық тексерістен өткізу ережелері қатаңдайды

Денсаулық сақтау министрлігі Көлік құралдарын басқару құқығын алуға үміткер адамды медициналық қарап тексеруден өткізу қағидаларын бекіту туралы жаңартылған ереженің жобасын әзірлеп жатыр. Құжатқа сай, медициналық тексеріс тегін көрсетілетін медициналық көмектер тізіміне кірмейді. Одан жүргізуші куәлігін алғысы келетіндермен қатар,

1. жолаушы және қауіпті жүк тасымалдайтын механикалық көлік құралдарының жүргізушілері;
2. механикалық көлік құралдарының 65 жастан асқан жүргізушілері;
3. мүгедектігі бар жүргізушілер;
4. механикалық көлік құралдарын мас күйде басқарғаны үшін не осындай күйдегі адамның басқаруына механикалық көлік құралын бергені үшін не жүргізушінің масаң күйде екенін анықтайтын медициналық куәландырудан өтуден жалтарғаны үшін механикалық көлік құралдарын басқару құқығынан айырылған адамдар өтуі тиіс.

Тексеруді медициналық ұйымдарда құрылған арнайы комиссия өткізеді. Оның құрамына терапевт, невропатолог, окулист, оториноларинголог, психиатр мен медициналық психолог және нарколог кіреді. Одан бөлек, жалпы қан сынамасы, зәр сынамасы алынып, флюорографиялық тексеріс (соңғы 6 айда тексерілмесе) және психикалық белсенді заттарды қабылдағанын анықтайтын зерттеулер жүргізіледі.

Азаматтың автокөлік жүргізуге жарамдылығына қатысты шешімді әр маман өз саласы бойынша шығарады. Тексеру нәтижелері № 083/у анықтамасына енгізіледі. Көзілдірік тағуы тиіс адамдардың анықтамасына «Көзілдірік тағуға міндетті» деген белгі қояды.

Есепте тұрған маскүнемдер, нашақорлар мен сынамасынан есірткінің не алкогольдің ізі табылғандарға анықтама берілмейді. Олар медициналық тексерістен тек 12 айдан кейін ғана өте алады. Егер осы уақыт аралығында куәлік алғысы келетін азамат наркологтар базасынан шығарылмаса, оның тексерістен өтуі тағы бір жылға шегеріледі.