Депутат Гүлдара Нұрымова ҚР премьер-министрінің бірінші орынбасары Роман Склярға жолдаған сауалында елімізде жыл сайын 13 мыңнан аса жол апаты болып, онда 2 мыңнан аса адам қаза тауып, 18 мыңға жуық тұрғын жараланатынын айтты. 2022 жылы оқыс оқиға саны 9 %-ға, жол апатынан кісі өлімі 21 %-ға артқан. Биыл жыл басынан бері полиция 4.5 млн жол ережесін бұзу дерегін анықтады, бұл жүргізушілердің біліктілігі төмен екенін көрсетеді.
Депутаттар оқыс оқиғаның көбіне жүргізушілердің жол ережесін дұрыс білмеуі себеп болады дейді. 2016 жылы куәлік алуға үміткердің теориялық және практикалық емтиханға өз бетінше дайындалуына рұқсат етілді, ал 2018 жылы автомектептерден лицензия талап етілмейтін болды. Осылайша жүргізуші куәлігін алғысы келетін азаматтардың оқу процесі формальды болып кетті.
«Оқу сапасы төмендеумен қатар емтихан тапсыру процедурасы да өзгерді. Емтиханды Ішкі істер министрлігі емес, „Азаматтарға арналған үкімет“ МК өткізетін болды. Нәтижесінде мамандандырылған ХҚКО-дағы автоматтандырылған автодром жетіспейтін болды, бұл үміткерлердің жүргізуші куәлігін алу үшін заңсыз жол іздеуіне және сыбайлас жемқорлықтың артуына себеп болды», — деді депутаттар.
Халық қалаулылары бірінші рет куәлік алғалы отырған азаматтың онлайн немесе өз бетінше оқуына жол бермеуді ұсынды. Сондай-ақ өзін-өзі реттейтін ұйымдар, кәсіптік бірлестіктер және «Атамекен» кәсіпкерлер палатасын тарта отырып, жүргізушілерді оқытудың мемлекеттік стандарты мен ережесін және автомектеп жауапкершілігін қайта қарауды ұсынды.
Қазіргі жүргізушілерді оқыту жүйесі, әсіресе емтихан алу тәсілінің кемшілігі жайлы Kolesa.kz редакциясы арнайы материал жазады.
Комментариев: 0