Мемлекеттік корпорация дерегіне сенсек, 2021 жылы қаңтарда 8181 адам Алматыдағы № 1 мамандандырылған ХҚКО-да емтихан тапсырып, 3120-сы жүргізуші куәлігін алды. Ақпанда да осы жағдай қайталанды: 9214 үміткердің 3527-і куәлік алған. Ал наурызда бұл көрсеткіш сәйкесінше 8968 және 3275, сәуірде 6147 және 2201 болды.
Мамырда жүргізуші куәлігін алғысы келетіндердің саны азая бастады: 2940 адам құжат тапсырып, 1111-і көлік жүргізу құқығына ие болды. Маусымда 2049 үміткердің 365-і ғана емтиханды сәтті тапсырды. Ал шілдеде сынаққа қатысқан 1811 адамның тек 323-і құжатқа қол жеткізді. Тамыз айы әлі бітпегенімен, жағдай өзгермейтіні қазірдің өзінде белгілі болып отыр. Алматыдағы № 6 мамандандырылған ХҚКО-да да жағдай осыған ұқсас.
Мегаполис пен облыс тұрғындарының жүргізуші куәлігін алуға ынтасы неге мұнша төмендегенін нақты айту қиын. «Азаматтарға арналған үкіметте» мұның басты себебі ретінде елдегі карантиндік шаралар аталып отыр. Мамандандырылған ХҚКО азаматтарды тек жазылу арқылы қабылдағандықтан, келушілер саны азайды деп санайды.
Бірақ екінші нұсқа шындыққа жақын сияқты. Сәуірден бастап Алматыдағы № 1 және № 6 мамандандырылған ХҚКО-да, сондай-ақ елордадағы орталықта емтихан тапсырушыларды биометриялық сәйкестендіру іске қосылды және тестке жауап беру барысы видеоға жазылатын болды. Мұндай бақылау болашақ жүргізушілердің емтихан барысында қулық істемеуі үшін енгізілген. Осындай қатаң бақылаудың арқасында сынақты заңсыз жолмен айналып өткісі келетіндер азайған секілді.
Комментариев: 0