Қазақстанның Энергетика министрлігі қолданыстан шыққан көлік құралдарын қабылдауға 2019 жылы берілетін квота көлемін бекітті.
«Оператор РОП» ЖШС-нің қабылдау орындары биыл жеңілдік беретін сертификаттар бағдарламасы бойынша 250 мың дана жеңіл көлік пен жүк көліктерін, ал ескі автокөліктерді сатып алу бағдарламасы бойынша тағы 25 мың көлікті қабылдай алады. Сонымен қатар министрлік жүк және жолаушы тасымалдайтын көліктерді өткізу барысында берілетін сертификат сомасын арттыру жөнінде шешім қабылдады. 2019 жылдың 20 ақпанынан бастап қолданыстан шығып қалған жүк көлігін не автобусты өткізгендер көлік құралының санатына байланысты 550 және 750 мың теңге көлемінде жеңілдік сертификатын ала алады. Бұрында сертификаттың көлемі 450 және 650 мың теңгені құрайтын. Ал ескі жеңіл көлікті өткізу сомасы бұрынғыдай, яғни 315 мың теңге көлемінде қалды.
Көлік санатына қарай берілетін жеңілдік сертификатының көлемі
| Санат | КҚ-ның классификациясы | Жеңілдік сертификаттарының саны | Жеңілдік сертификатының көлемі |
| М1 | Жеңіл автокөліктер | 22 200 | 315 000 |
| N1 | Ең ауыр салмағы 3.5 тоннадан аспайтын жүк тасымалдауға арналған көлік құралдары | 1 800 | 550 000 |
| M2 | Жүргізуші орындығын қоспағанда, отыруға арналған орын саны 8-ден аспайтын, ең жоғарғы салмағы 5 тоннадан аспайтын жолаушы тасымалдауға арналған көлік құралдары | 1 800 | 550 000 |
| N2 | Ең ауыр салмағы 3.5 тоннадан жоғары, бірақ 12 тоннадан аспайтын жүк тасуға арналған көлік құралдары | 1 800 | 550 000 |
| M3 | Жүргізуші орындығынан бөлек, отыруға арналған орын саны 8-ден көп, ең жоғарғы салмағы 5 тоннадан асатын жолаушы тасымалдауға арналған көлік құралдары | 1 000 | 750 000 |
| N3 | Ең жоғарғы салмағы 12 тоннадан көп жүк тасуға арналған көлік құралдары | 1 000 | 750 000 |
Естеріңізге сала кетейік, ескі автокөліктерді сертификат арқылы кәдеге жарату шарасы Қазақстанда 2017 жылдың 26 маусымынан бастап қолға алынған болатын. Осы уақыт аралығында ел азаматтары 20 939 көлікті сертификатқа ауыстырған.
Сонымен қатар, ескі көлікті сатып алуға негізделген бағдарлама аясында 67 052 жеңіл көлік қабылданып, 10 млрд 48 млн теңге көлемінде құн төленіпті. Екі бағдарламаның жұмыс істеу барысында 88 мыңға жуық көлік әрі қарай өңдеу мақсатында қабылданған.
Комментариев: 0