Биыл 10–12 қазанда Автомобиль көлігі және көлік бақылау комитеті, әкімшілік полиция мен көлік прокуратурасы қызметкерлері республикалық «Тасымалдаушы» акциясын өткізді.
Көлік министрлігі рейд барысында 13.6 мыңнан астам жүргізуші мына ережелерді бұзғанын хабарлады:
- 1962 жағдайда техбайқау құжаты жоқ немесе көлік техникалық талаптарға сай келмеді;
- 1167 жағдайда жүргізуші жолаушы мен жүк тасымалдау ережесін сақтамаған;
- 394 жағдайда жолаушыларды заңсыз тасымалдаған.
Полиция таксистер еңбек және демалыс режимін бұзып, күніне 5–6 қалааралық рейс жасағанын анықтады. 268 жүргізуші көлікті мас күйінде жүргізсе, 2506 адам рөлде отырып телефон пайдаланған.
Тәртіп сақшылары Toyota Alphard, Estima және басқа оң рөлді минивэндерге баса назар аударды. Акция барысында осындай 213 машина қарсы жолаққа шыққан.
Жолаушы мен багаж тасымалдау ережесіне сәйкес такси қызметіне сол рөлді жеңіл көліктер ғана жарамды.
Биыл шілдеде Жамбыл және Алматы облыстарында Toyota Alphard екі ірі жол апатына ұшырады. Қыркүйектің аяғы мен қазанның басында «альфард» қатысқан апат салдарынан 18 адам қайтыс болды. Сол кезде депутаттар Қазақстанда мұндай көліктерге мүлде тыйым салу қажет деген.
Комментариев: 0