Қазақстанда оқушылар арасында бір жаман әдет қалыптасқан. Жыл сайын 25 мамырда түлектердің ерсі әрекеті жазылған видеолар әлеуметтік желіде қаптап кетеді. Биыл да солай болды. Алматы облысында мектеп бітірушілер жол ережесін өрескел бұзды. Төрт көліктен тұратын кортеж Алматы — Бішкек тас жолында сайран салған. Олардың кейбірі көліктің мемлекеттік нөмірін алып тастапты. Ал машинадағы оқушылар люктен, терезеден бастарын шығарып, қауіпті жағдай тудырған.
Полиция ереже бұзушыларды бірден анықтады. Облыстық департамент барлық көлік айып тұрағына қойылғанын, ал жүргізушілердің атына бірнеше хаттама толтырылғанын хабарлады. ВАЗ-2115-ті басқарған жігітке қауіпсіздік белдігін тақпау (Әкімшілік кодекстің 593-бабы 2-бөлігі), машинаны мемлекеттік нөмірсіз жүргізу (ҚР ӘК 590-бабы 2-бөлігі), маневр жасау ережесін бұзу (ҚР ӘК 595-бабы 1-бөлігі), қауіпті жағдай тудыру (ҚР ӘК 606-бабы 1-бөлігі), жолаушы тасымалдау ережесін сақтамау (ҚР ӘК 593-бабы 1-бөлігі) және жүргізуші куәлігінің болмауы (ҚР ӘК 612-бабы 2-бөлігі) бойынша айыппұл салынды.
Айыппұлдың жалпы сомасы 160 мың теңгеден асады.
Автотұрақта айнала сырғанап, ереже бұзған ақтаулық түлек те жазаланды. Жас BMW жүргізушісі Әкімшілік кодекстің 505 және 593-бабы бойынша жауапқа тартылып, 25 АЕК (72 925 теңге) айыппұл арқалады.
Өңірлік ПД өкілдері 25 мамыр күні Ақтауда 20 түрлі ереже бұзу дерегі тіркелгенін хабарлады. Жеті автокөлік айыптұраққа жеткізілді.
Комментариев: 0