Жеке тұлға елге жүк көлігі мен автобус кіргізе алмайды

Еуразиялық экономикалық комиссия «жеке тұлғаның жеке қажеттілігі үшін әкелетін көлік құралы» ұғымын нақтылады. Kolesa.kz редакциясына Өнеркәсіп және құрылыс министрлігінің Өнеркәсіптік саясат департаментінің директоры Әділбек Бектібаев тараптар «жеке қажеттілік» ұғымы кәсіпкерлік қызметпен байланысты болмауға тиіс деген шешімге келгенін хабарлады.

Не нақтыланды

Еуразиялық экономикалық комиссия (ЕЭК) «жеке тұлғаның жеке қажеттілігі үшін әкелетін көлік құралы» мен «жеке пайдалануға арналған көлік құралы» ұғымдары бір мағынаны білдіреді деген ортақ шешімге келді. Себебі жеке тұлғаның жеке қажеттілігіне немесе жеке мақсатына оның жеке, отбасылық, тұрмыстық және кәсіпкерлік қызметпен байланыс жоқ өзге қажеттіліктер кіреді. Осы ұғымның КО ТР 018/2011 мен Кеден одағының Кеден кодексінде әртүрлі түсіндірілуі даулы жағдайларға себеп болған.

Не әкелуге болады және болмайды?

Қабылданған өзгерістер күшіне енгеннен кейін, «жеке тұлғаның жеке қажеттілігі үшін әкелетін көлік құралы» ұғымына тек «жеке пайдалануға арналған көлік құралдары» жататын болады. Жүк көтергіштігі 5 тоннадан асатын жүк көліктері, орын саны 12-ден асатын автобус және арнайы техника мұндай көліктер қатарына енбейді. Жеке тұлға көлік құралы құрылымының қауіпсіздігін растайтын куәлік рәсімдей алмайды. Тиісінше, олар Қазақстанда кедендік рәсімдеуден өте алмайды және тіркеуге алынбайды.

Жеке тұлға елге мототехника, жеңіл көлік, жеңіл жүк көлігі, шағын автобус және жалпы салмағы 3.5 тоннадан аспайтын тіркемені әкеле алады, бірақ автомобиль тасымалдауға арналған тіркемені әкелуге тыйым салынады.

Кедендік рәсімдеу қалай өзгереді?

Жеке тұлға әкелетін көлікке (жүк көлігі мен автобустан басқа) қатысты кедендік рәсімдеу тәртібі өзгермейді. Яғни көлік құралын бұрынғыдай кедендік жолаушы декларациясы (жеке пайдалануға арналған тауардың мөлшерлемесі бойынша — құнының 48–54 %-ы көлемінде немесе көлік категориясына байланысты жиынтық төлем бойынша кедендік рәсімдеуден өткізеді) немесе ішкі тұтынуға арналған кедендік рәсім бойынша Бірыңғай кедендік тариф мөлшерлемесімен — 15 % көлемінде рәсімделеді.

Тыйым қашан күшіне енеді?

ЕЭК шешімі ресми жарияланған күннен бастап 90 күннен кейін күшіне енуге тиіс. Қазір бұл құжатты Беларусь, Ресей, Қазақстан және Қырғызстан мақұлдады. Арменияда ішкі мемлекеттік талқылау процесі жүріп жатыр.

Барлық ел қол қойғаннан кейін, өзгерістер қазан айының аяғы мен қарашаның басында күшіне енеді.

Тағы қандай шектеу болады

ЕЭК Комиссиясының шешіміне сәйкес ЕЭО-ға мүше басқа елдерден келген SOS батырмасы және көлік құралы құрылымының қауіпсіздігін растайтын куәлігі жоқ барлық көлікті Қазақстанда (және Одақ елдері арасында) тіркеуге тыйым салу көзделіп отыр.