Жедел жәрдем жүргізушісін соққыға жыққан ер адамның кешірім сұраған видеосы пайда болды

Алматыда жедел жәрдем жүргізушісіне қол жұмсаған Түркия азаматының кепілмен босатылғаны жайлы ақпараттың таралғанына бір күн өтпей-ақ, әлеуметтік желілерде сотқар жігіттің қазақстандықтардан кешірім сұраған бейнежазбасы пайда болды.

— Мен Түркия азаматы Әли Демир, 18 қыркүйек күні Мақатаев көшесі мен Наурызбай батыр көшесінің қиылысында болған оқиға үшін бүкіл Қазақстан халқынан шын жүректен кешірім сұраймын. Жедел жәрдем жүргізушісі Кучма Николай Григорьевичтен кешірім сұраймын. Жасаған қателігімді мойындаймын. Сол күндері күйзелісте жүрдім. Мұның себебі — көлігімнің ұрлануы еді, әрине, бұл жасаған қателігімді ақтамайды. Бірақ мен Қазақстан халқынан маған түсіністік танытуды өтінемін. Осындай жағдай ер адамның басына келуі мүмкін. Мен біреуге әкемін, біреуге жармын, бес айлық қызым бар. Олар Қазақстан азаматтары. Менің бүкіл жұмысым Қазақстанда, мұнда тұрғаныма 7 жыл болды. Менің жасаған қателігім үшін отбасымның жапа шеккенін қаламаймын. Сол үшін сіздерден тағы да шын жүректен кешірім сұраймын, — дейді Демир бейнежазбада.

Қазіргі таңда Түркия азаматы сот шараларын күтуде. Оған қатысты ҚР ҚК-нің «Бұзақылық» бабының 1-бөлігімен тергеу жүргізіліп жатыр. Заңға сәйкес, Демир 2 000 АЕК көлемінде айыппұл төлеп, жазадан құтылуы мүмкін. Аталған бап бойынша тағайындалатын ең қатаң жаза — екі жыл мерзімге бас бостандығынан айыру. Сонымен қатар, депортациялау шарасын да естен шығармаған жөн.

Ескере кететін бір жәйт, іс-әрекеті бүкіл қоғамды дүрліктірген адамдар қазақстандықтар алдында дәл осылай кешірім сұрауды әдетке айналдырғандай. Мүмкін, ендігәрі видео үндеуді ӘҚБК-не енгізу қажет шығар?