Lada Vesta FL атауымен жарық көретін рестайлинг жайлы ақпарат біраз уақыт бұрын тарай бастады. Қазір оның алдыңғы бөлігіне жаңа жіңішке оптика қойылатыны, салонында ірі планшет тұратыны белгілі. Енді оны ресми түрде қашан таныстыратынын білу қалды. Автоөндіруші әлі жақ ашпай отырғандықтан, зауыт маңында жүрген дерек берушілердің көмегіне жүгінуге тура келеді.
Нақты айтсақ, «Нетипичный АВТОВАЗ» парақшасы модель 2022 жылы 1 наурызда Ижевскідегі зауыт конвейеріне тұратынын жазды. Дәл сол уақытта салондарға жеткізіле бастайды екен. Өйткені дилерлер көліктің моделін, комплектациясы мен түсін таңдау үшін зауыт мамандары оны алдын ала құрастыратын көрінеді. Алғашқы Vesta FL тұсаукесерге және жолдағы сынаққа қатысады. Ал тапсырыс берген клиенттер темір тұлпарды мамырда тізгіндей алады.
«Вестаның» қазіргі нұсқасы қазан айынан бері артқы бампердің күшейткіш арқалығынсыз шығарылып жатыр, алайда бұл кемшілік көлік бағасына еш әсер етпеді.
Комментариев: 0