Жаңарған Toyota Land Cruiser 300 салонының алғашқы суреттері шықты

Toyota Land Cruiser 300-дің интерьері жаңарды. Бұл туралы Жапониядағы Creative Trend басылымы жариялаған тыңшылар түсірген суреттерден көруге болады. Автомобиль өзгеретінін Toyota концернінің штаб-пәтері емес, Аустралиядағы бөлімшесі жария етті.

Бренд Land Cruiser 300-ге цифрлы аспаптар панелін орнатты. Басылым мәліметінше, компания бұл бөлшекті қазіргі Alphard/Vellfire және Prado 250-ден алған.

Климаттық жүйені басқару блогында кішкентай экран пайда болады, ал қазір параметрлері медиажүйенің ортаңғы сенсорлы экранына шығады. Жүйе жақсарған навигациямен толығады. Машинада енді CD/DVD ойнатқыш болмайды.

Ресми мәліметтерге сәйкес, модельдің базалық нұсқасы 7 дюймдік аспаптар панелімен жабдықталады, ал қымбат комплектацияда 12.3 дюймдік экран болады. Бұл нұсқалар төрт аймақты климат-бақылау жүйесін және тоңазытқыш алады. DVD-плеердің орнына HDMI порты орнатылады. Safety Sense кешенінің мүмкіндіктері кеңейді.

Техникалық жағынан өзгеріс жоқ, бірақ Аустралияда көлік тек 309 ат күшін және 700 Нм момент беретін 3.3 литрлік дизельді V6-мен жүреді. Ол 10 сатылы автоматпен және ось аралық дифференциалды бұғаттағышы бар толық жетек жүйесімен жұптасады.

Жаңарған Toyota Land Cruiser 300 Аустралия нарығына келер жылдың екінші тоқсанында шығады. Демек рестайлингтің ресми премьерасы жақында өтеді.