Әлемдік тұсаукесерден алты ай өткен соң жаңарған Kia Soul Қазақстан нарығына шықты, Марка модельді жеті комплектацияда ұсынады, бағасы 10 490 000–14 190 000 теңге аралығында. Бұрын көлік 10 190 000–13 890 000 теңге тұратын, демек баға аздап өсті.
Мотор гаммасында үлкен өзгеріс жоқ. Classic, Comfort, Comfort+ және Luxe нұсқасы 6 сатылы автоматпен жұмыс істейтін 1.6 литрлік бензинді мотормен (123 ат күші мен 151 Нм) жүреді. Ал Style, Premium, GT Line жиынтығына 2.0 литрлік атмосфералы қозғалтқыш (149 ат күші мен 180 Нм) қойылады. Барлық түрленім алдыңғы жетекті болады.
10 490 000 теңге тұратын Classic ауа баптағыш, Drive Mode Select, ESC жүйесі, алты қауіпсіздік жастығы, артқы көрініс камерасы, шина қысымын бақылау жүйесі және 16 дюймдік жеңіл балқытылған дөңгелек дискісімен жабдықталады. Салонда 8 дюймдік экраны бар Apple CarPlay және Android Auto-мен жұмыс істейтін мультимедиа кешені орнатылған. Алдыңғы орындық пен бүйірлік айнаны жылытуға болады.
Comfort нұсқасында (10 790 000 теңге) жеке климат-бақылау, круиз-бақылау, рөл жылытқыш бар әрі трансмиссия селекторы мен рөлі былғарымен қапталады. 11 190 000 теңге төлеп, Comfort+ түрленімін алсаңыз Smart Key кілтсіз ашу жүйесі, қозғалтқышты іске қосу батырмасы және 17 дюймдік жеңіл балқытылған дөңгелек дискісі сияқты опцияға ие боласыз. Luxe жиынтығында (11 390 000 теңге) бұлардан бөлек жылытуға болатын алдыңғы әйнек және электр жетегі бар бүйірлік айна болады.
Style комплектациясы едәуір қымбат, 13 290 000 теңге тұрады. Өйткені мұндай машинаның сырт пішіні мен электроникасы алдыңғылардан көп жақсы. Атап айтқанда, хроммен қапталған жылтыр радиатор торы, GT Line топтамасының бампері, табалдырығы және 18 дюймдік жеңіл балқытылған дөңгелек дискісі, жарықдиодты оптика, электрлі реттелетін жүргізуші орындығы, барлық орындықты жылыту және ұялы телефонды сымсыз қуаттау мүмкіндігі бар.
13 790 000 теңге тұратын ең үздік Premium түрленімінде былғары орындық қаптамасы, электрлі реттеуге және жылытуға болатын алдыңғы орындықтар, электрлі тұрақ тежеуіш, Stop&GO функциясы бар интеллектуалды круиз-бақылау (SCC) және жолақта ұстау көмекшісі (LFA) бар.
Ал спорттық көлік секілді жабдықталған GT Line комплектациясы 14 190 000 теңге тұрады. Ол GT Line топтамасының 18 дюймдік жеңіл балқытылған дөңгелек дискісі, бампері және табалдырығымен, шығару жүйесінің қос келтеқұбыры, люк, спорттық рөл және GT Line дизайнында жасалған былғары орындықтармен ерекшеленеді.
жаксы колик, толык жетек болганда гой