Жаңарған Kia Seltos Қазақстанға келді

2022 жылы жазда шыққан жаңарған Kia Seltos енді Қазақстанда. Кроссовер екі алдыңғы жетекті және бір толық жетекті нұсқада сатылады.

Қазақстанда Kia Seltos-тың барлық түрі IVT вариаторымен жұптасатын 149 ат күшіне ие 2 литрлік атмосфералы мотормен жүреді.

Автомобиль Comfort және Luxe комплектациясында сатылады. Seltos-тың стандарт жабдықтар тізімінде ABS және ESC сияқты базалық қауіпсіздік жүйесі, шина қысымын бақылау, алдыңғы қауіпсіздік жастығы, галогенді шам, рөлдің биіктігі мен орнын реттеу мүмкіндігі, Apple CarPlay және Android Auto-мен жұмыс істейтін 8 дюймдік экраны бар медиажүйе бар.

Қарапайым Comfort нұсқасы жылытуға болатын алдыңғы орындық, әйнек жуғыш бүріккішпен, айнаны жылыту опциясымен жабдықталған. Артқы көрініс камерасы, алдыңғы және артқы парктроник, салқындатқыш орнатылған. Орындық матамен, ал рөл мен беріліс қорабының селекторы былғарымен қапталған. Seltos-тың Comfort комплектациясы 12 млн теңге тұрады.

Luxe түрі жылытуға болатын артқы қатар орындығы мен рөлі, бүйірлік қауіпсіздік жастығы, құйылған дөңгелек дискісі, бірнеше түрлі жүріс режимі, климат-бақылау, круиз-бақылау және кілтсіз ашу жүйесімен ерекшеленеді. Мұндай кроссовердің алдыңғы жетекті нұсқасы 12.9 млн теңге болса, толық жетекті нұсқасы 13.6 млн теңге тұрады.

Қазір Қазақстанда рестайлингке дейінгі Kia Seltos 11.8–14 8 млн теңгеден сатылып жатыр. Автомобильді марка жеті комплектацияда ұсынған, оның төртеуінде толық жетек жүйесі бар. Жаңарған машина 200–400 мың теңге қымбаттады.