Алматыда жасалатын Hyundai Tucson-ның жаңарған көлік типін мақұлдау құжаты жарияланған сәттен бір апта өткен соң бағасы белгілі болды.
Tucson 2 не 2.5 литрлік бензинді мотормен жүреді. Алғашқысының алдыңғы және толық жетекті нұсқалары бар, екеуінің де қозғалтқышы 6 сатылы автоматпен жұмыс істейді. Ал екінші агрегат тек толық жетек жүйесімен және 8 сатылы автоматпен жұптасады.
Моножетекті базалық Comfort-тың жабдықтар тізімінде алдыңғы және бүйірлік эйрбэг, қауіпсіздік пердесі, көмекші электрониканың стандарт жинағы, круиз-бақылау және жылдамдықты қолмен шектегіш, кілтсіз ашу, жарық пен жаңбыр сезгегі, екі аймақты климат-бақылау, алдыңғы орындықты, рөлді, айна және алдыңғы әйнекті жылытқыш, экраны 12.3 дюймдік медиажүйе, аспаптар панеліндегі 4.2 дюймдік дисплей және тағы басқа құралдар бар. Салоны матамен қапталған, орындығы мен рөл колонкасы қолмен реттеледі. Бағасы — 14.5 млн теңге. Дәл осындай комплектациядағы алдыңғы буын өкілі 13.7 млн теңге тұратын. Былтыр құны 12.6 млн теңгеге дейін түсті, бірақ толық жетек үшін үстінен 500 мың теңге беру керек.
2.5 литрлік мотормен жүретін «туссандардың» ең арзаны — Travel. Ол парктроник, орындықтардың екінші қатарын жылытқыш, электрондық қол тежеуіші, смартфон қуатттағыш, 18 дюймдік дөңгелек дискісімен толықты. 16.9 млн теңге тұратын бұл көліктің салоны былғарымен қапталады. Travel-дің 2 литрлік мотор орнатқан түрленімі де бар. Артқы жетектісін 15.6 млн теңгеге, ал толық жетектісін 16 миллионға аласыз.
Жаңарған Tucson-ның үздік түрі Luxe деп аталады. Бұл айнала шолу камерасы, бейімді круиз-бақылау, автотежеу, қозғалыс жолағы мен көрінбейтін аймақты бақылау, жолақта ұстау функцияларына ие жүргізуші көмекшілерінің толық жинағын алған жалғыз нұсқа. Автомобиль панорамалық шатыр, цифрлы аспаптар панелі (12.3 дюйм), амбиент жарық, орындық желдеткіш, жүксалғыш есігінің электр жетегі, Krell премиум аудиожүйесі және 19 дюймдік дөңгелек дискісімен жабдықталады. Құны — 19 млн теңге. Жаңарғанға дейін жеңілдікті қоспағанда, 18.6 млн теңгеден саудаланған.
Комментариев: 0