Жаңарған Hyundai Elantra-ның елдегі бағасы қанша

Биыл наурызда Hyundai жаңарған төрт есікті Elantra-ның алғашқы суреттерін көрсеткен. Арада жарты жылдан аз уақыт өткенде компания көліктің жиынтық түрі мен Қазақстандағы бағасын жариялады.

Рестайлингтен өткен седанды ел аумағында 1.6 (128 а.к.,155 Нм) және 2 литрлік (149 а.к., 180 Нм) мотормен ұсынады. Қарапайым қозғалтқыш 6 сатылы автоматпен жұптасса, 2 литрлік агрегат IVT интеллектуалды вариаторымен жұмыс істейді.

1 / 7

• 
• 
• 
• 
• 
• 
• 

1 / 7

Базалық Start нұсқасының жабдықтар тізімінде алдыңғы қауіпсіздік жастығы, артқы шолу камерасы, жарықдиодты шамдар, көмекші электроника жинағы, круиз-бақылау, ауа баптағыш, алдыңғы орындықты жылыту жүйесі, салонды қосымша жылыту құралы, 8 дюймдік медиажүйе дисплейі және аспаптар панелінің 4.2 дюймдік экраны мен бірнеше USB-C-порт бар. Рөл колонкасы мен орындықтар қолмен реттеледі. Elantra-ның қарапайым түрі 11 млн теңге тұрады, бағасы рестайлингке дейінгі осыған ұқсас автомобильден 300 мыңға жоғары. Ертерек механикалық қораппен жабдықталған Start нұсқасын 10 млн теңгеге ұсынған еді.

1.6 литрлік қозғалтқышпен жүретін Prestige 13.2 млн теңгеге бағаланып отыр. Бұндай машинада алдыңғы және бүйірлік қауіпсіздік жастығы (+ пердеше), алдыңғы және артқы парктрониктер, шина қысымын бақылау жүйесі, екі аймақты климат-бақылау, круиз-бақылау, барлық орындықты және рөлді жылыту жүйесі, кілтсіз ашу жүйесі, сымсыз қуаттағыш бар, жүргізуші орындығы электр көмегімен реттеледі. Салонда 10.25 дюймдік медиажүйе дисплейі, көлемі сондай аспаптар панелі тұр. Салонда бірнеше USB-C сымға арналған орын қарастырыпты. Интерьер былғарымен қапталған.

1 / 5

• 
• 
• 
• 
• 

1 / 5

Elantra-ның 2 литрлік мотормен және вариатормен жабдықталған екі нұсқасы болуы мүмкін. 12.9 млн теңге тұратын — Modern, сонымен қатар 14.4 млн теңгелік — Luxe. Алғашқысы Prestige-ге ұқсайды, бірақ бүйірлік эйрбэгі және пердесі, сымсыз қуаттағышы болмайды, жүргізуші орындығы электр көмегімен реттелмейді, салоны матамен қапталады.

Luxe — барлық жабдығы бар нұсқа. Яғни машина автоматты тежеу жүйесі, жолақты және көрінбейтін аймақты бақылау, сызықтан шықпау, интеллектуалды круиз-бақылау және басқа жүргізуші ассистентінің толық жинағымен сатылады. Бұдан бөлек алдыңғы жолаушы орындығы мен люкті электрлі реттеуге болады. Сыртынан Luxe автомобильді радиатор торындағы хромдалған элементтері мен жарықдиодты шамдарынан танисыз.