Жаңарған Hyundai Creta-ның тұсаукесері қашан өтеді

Hyundai 16 қаңтарда Үндістанда рестайлингтен өткен Creta-ны көрсетеді. Марка кроссовердің сырт пішінін өзгертіп, жаңа турбомотор орнатты. Жергілікті баспасөз тұсаукесерден кейін көп кешікпей «Крета» саудаға шығатынын хабарлады.

Hyundai Creta-ның дизайны айтарлықтай өзгереді. Марка шағын кроссоверді үлкен әрі қымбат модельдер стилінде жасайтын, бірақ бұл жолы оны өзгеше радиатор торы мен оптикасы бар Tucson-ға емес, қырлы Santa Fe мен Exter-ге ұқсатады.

Creta жаңа бампер, басқаша радиатор торы және тікбұрышты жарық техникасымен ерекшеленеді. Кроссовердің салонында қандай өзгеріс болатыны қазірше белгісіз. Қолда бар ақпаратқа сенсек борттық жабдықтар тізімі көбейеді, мысалы, айнала шолу камерасы болады.

Мотор гаммасы көп өзгермейді. Машина 115 және 116 ат күшіне ие 1.5 литрлік бензинді және дизельді мотормен жүреді. Бензинді қозғалтқыш 6 сатылы механика және IVT вариаторымен, ал дизельді нұсқа 6 сатылы автоматпен жұмыс істейді. Бұл қатарға 1.5 литрлік турбоүрлемді мотор қосылуы мүмкін, оны Hyundai қазір Үндістанда үлкенірек Alcazar-ға орнатып жатыр.

Модельдің қуатты Creta N Line нұсқасы 160 ат күшіне ие төрт цилиндрлі мотормен жүреді деген ақпарат бар. Марка мұндай машинаға 18 дюймдік дөңгелек дискісін орнатады.

Hyundai Creta-ның жаңарған нұсқасы дайын. Сырт пішіні Tucson-ға ұқсайтын кроссовер Индонезияда саудаға түседі. Үндістан нарығына арналған түрленімі бұрын Қазақстандағы Hyundai Trans Kazakhstan зауытында шыққан «Кретаға» ұқсайды. Инсайдерлер Үндістанда жарық көрген кроссовер тұтас әлемде сатылуы мүмкін екенін айтты.