Жаңа жылдамдық шегі, жаңа айыппұл. Әкімшілік кодекске тағы қандай өзгеріс енеді?

Мәжілісте талқыланып жатқан құжатта 592-бапқа өзгеріс еніп, көлік жылдамдығын 60 км/сағ және одан жоғары асырған жүргізушіге 40 АЕК (2024 жылы 147 680 теңге), ал бір жыл ішінде қайталаса 60 АЕК (221 520 теңге) айыппұл салу туралы ұсыныс бар.

Жоба авторлары 2023 жылғы 4 айда Алматы және Жамбыл облысындағы камералар 60 км/сағ жылдамдықпен жүруге рұқсат етілген жолда сағатына 233 және 220 км жылдамдықпен жүйткіген жүргізушілерді тіркегенін айтты. Яғни, белгіленген шектен 160 км/сағ асырған. Елде жылдамдық шегін 80-160 км/сағ асырған 1436 жүргізуші анықталды.

Ал 602-бап бойынша сытқы жарық құралын немесе дыбыс сигналын пайдалану ережесін бұзғаны үшін жаза жеңілдеп, күндізгі жарық шамын жақпаған жүргізушіге тек ескерту жасалады. Бұл әрекет үшін полицейлер қазір де ескерту жасайды, бірақ «немесе 3 АЕК айыппұл (2024 ж. 11 076 теңге) салу» деген қосымша талап бар.

Құжат әзірлеушілер Әкімшілік кодекстің 43-бабына сай полицейлер әкімшілік жазаны ауырлататын мән-жайлар болмаған жағдайда ескерту жасауға міндетті екенін айтты, яғни, мұндай жағдайда айыппұл түріндегі жазаны қолданбайды. Әкімшілік кодекстің 602-бабына енген өзгеріс норманы біркелкі қолдануға және сыбайлас жемқорлықты жоюға мүмкіндік береді.

Ал кодекстің 615-бабындағы жаяу жүргіншілер мен жол қозғалысының басқа қатысушылары тізімінен мопед алынады, өйткені ол жақында көлік құралы атанады. Мотоцикл сияқты мопедті де тіркеп, жүргізуші куәлігін алуға тура келеді. Яғни, мопедші шлем киіп, жол ережесін сақтауға міндетті болады.

Сондай-ақ кодекстің 620-бабы 1-бөлігінен «жол қозғалысына қатысушыларға қойылатын өзге де талаптарды бұзғаны үшін» айыппұл салу жазасы алынады. Бұл бапта да «немесе» деген қосымша бар болатын, мысалы, самокатшы шлем тақпаса ескерту беру немесе 3 АЕК айыппұл салу көзделген. Бұл бап енді екі бөлікке бөлінеді, полиция бірінші рет жүргізушіге ескерту жасайды, бір жыл ішінде ережені қайта бұзса айыппұл салады.

Жол жөндеу, жолды күтіп ұстау және көшедегі кәріз желісі мен құдықты жөндеу талабын бір жылда бірнеше рет орындамаған лауазымды тұлға мен кәсіпорын басшысының жауапкершілігі кодекске енуі мүмкін.

Ол үшін әкімшілік кодекстің 631 және 632-бабына өзгеріс енеді. Бұл өзгеріс тазаланбаған жол немесе сынған люк үшін айыппұл арқаласа да ештеңе жөндегісі келмейтін коммуналдық мекемелерді тәртіпке салады.

Айыппұл салатын болса, жол жөндеу жұмыстарының сапасы артады деп үміттенеміз.