Шектеулі мөлшерде шығарылған арнайы нұсқаларын есептемегенде, бұл «Гольф» тарихындағы ең қуатты темір тұлпар. Жетілдірілген 2.0 TSI турботөрттігі 320 ат күші мен 420 Нм айналу моментін береді. Мотор 6 сатылы механикамен немесе 7 диапазонды DSG-мен жұптасады.
Жылдамдығы сағатына 250 шақырымнан аспайды, бірақ R Performance пакетін алсаңыз, 270 км/сағ жылдамдықпен жүйткуге болады. Машина бірінші жүздікті 4.7 секундта еңсереді. Жылдамдыққа жаны құмарлар түрленген толық жетекті 4Motion-ді жоғары бағалауы тиіс. Мұнда әдеттегі муфтаның орнына дербес борттық фрикцион орнатылған, соның арқасында дрифт-режимді қосқанда артқы оське түсетін тартыс 100 %-ға жетеді.
Golf R аспасы анағұрлым қатаң, клиренсі 20 мм-ге төменірек. Опция ретінде Akrapovic газ шығару жүйесін орнатуға мүмкіндік бар, ал 18 не 19 дюймдік дөңгелектерді жарысқа қатысатын машинаға орнатуға болады.
Интерьері R стилінде жасалған. Жаңа Volkswagen Golf R Еуропада жыл соңына қарай 50 мың еуродан сатыла бастайды. 2021 жылдан бастап өзге елдерге жеткізіледі.
Комментариев: 0