Volkswagen су жаңа Caravelle микроавтобусы мен PanAmericana нұсқасындағы фургонның камуфляжсыз түскен суретін жария етті. Топтаманың техникалық сипаттамасы көктемде белгілі болған, өйткені бренд бірнеше ай бұрын көлікке тапсырыс қабылдай бастады.
Volkswagen Transporter PanAmericana
Volkswagen Transporter PanAmericana
Volkswagen Transporter PanAmericana
Transporter T7-нің алдыңғы бөлігі марканың басқа вэндеріне ұқсас стильде әрленген, ол тек жарық техникасы, бампер және радиатор торымен ерекшеленеді. Бірақ шанағынан VW мен Ford бірге жасаған Transit Custom-мен түбі бір екені байқалады. Интерьері де дәл сондай. Мұнда «Фордқа» тән архитектура жақсы байқалады. PanAmericana-ға мамандар боялмаған пластиктен жасалған бастырық қойып, жаңа дөңгелек орнатты.
Transporter ұзындығы 5050 және 5450 мм болатын екі шанақпен шығады, дөңгелек базасы 3.1 не 3.5 метр болады. Жүк қоятын орын көлемі 9 текше метрге жететін фургон 1330 келі жүк тиеуге жарайды. Жолаушы тасуға арналған түрлері 9 адамға шақталған.
Transporter-дің мотор гаммасы дәстүрлі агрегат, гибрид және электрлі құрылымдардан тұрады. 110-170 ат күшін беретін екі литрлік дизель 6 сатылы механикамен не 8 сатылы автоматпен жұмыс істейді. Бренд толық жетекті опция түрінде ұсынады. 2.5 литрлік бензинді қозғалтқыш пен электромотордан тұратын гибридтің бойында 232 арғымақтың күші бар, машина тек алдыңғы жетекті болады. Ал электрлі нұсқа бастапқыда 136-286 ат күшіне ие мотормен жүрсе, кейін қос моторлы түрленімі шығады.
Volkswagen Caravelle
Volkswagen Caravelle
Volkswagen Caravelle
Volkswagen көктемде Германияда жаңа Transporter-ге тапсырыс қабылдай бастаған. Көлік бағасы 43 768 еуродан (шамамен 22.5 млн теңге) басталады. Топтаманың ресми тұсаукесері қыркүйекте өтеді, бірақ клиенттерге қашан жететіні белгісіз. Алдын ала мәлімет бойынша немістер машинасын келер жылы алуы мүмкін.
Комментариев: 0